აშშ-ის ტენესის შტატში სიკვდილმისჯილი კრისტა პაიკი, რომელიც სასიკვდილო ინექციის შემდეგ გადარჩა, გონზე მოვიდა და საუბარი შეუძლია. ამის შესახებ მისმა ადვოკატებმა განაცხადეს. ინფორმაციას Reuters ავრცელებს.

50 წლის პაიკის სიკვდილით დასჯა 30 სექტემბერს, ნეშვილში, რივერბენდის მკაცრი რეჟიმის ციხეში უნდა აღსრულებულიყო. მას სასიკვდილო ინექციისთვის პენტობარბიტალის ორი დოზა გაუკეთეს, თუმცა პროცედურა ვერ დასრულდა - პაიკმა გონება არ დაკარგა და გულისცემა შეუნარჩუნდა. მოგვიანებით ის საავადმყოფოში გადაიყვანეს.

ადვოკატების განცხადებით, პაიკს ხელებზე მძიმე დაზიანებები აქვს, თუმცა ის ახლა გონზეა, საუბრობს და კრიტიკულ სამედიცინო დახმარებას კვლავ იღებს. მათი თქმით, მისი პროგნოზი ჯერ გაურკვეველია და გამოჯანმრთელებას ხანგრძლივი პერიოდი დასჭირდება.

პაიკს სიკვდილით დასჯა 1995 წელს 19 წლის კოლინ სლემერის მკვლელობისთვის ჰქონდა მისჯილი. ის ტენესიში დაახლოებით ორი საუკუნის განმავლობაში პირველი ქალი უნდა გამხდარიყო, რომლის სიკვდილით დასჯაც აღსრულდებოდა.

მისი ადვოკატების თქმით, პაიკი შეერთებულ შტატებში პირველი ადამიანია, რომელმაც სიკვდილით დასჯის პროცესის დროს სასიკვდილო პრეპარატის მიღების შემდეგ გადარჩენა შეძლო.

პაიკს სიკვდილით დასჯა 1995 წელს, 18 წლის ასაკში, თანაკლასელის, კოლინ სლემერის მკვლელობისთვის ჰქონდა მისჯილი. 

არსებული ცნობებით, 1995 წლის 12 იანვარს, ტენესის შტატის ქალაქ ნოქსვილში, 18 წლის კრისტა პაიკმა თანამზრახველებთან - 17 წლის შეყვარებულთან ტადარილ შიპთან და 18 წლის შადოლა პეტერსონთან ერთად 19 წლის კოლინ სლემერი მოკლა. ოთხივე Job Corps-ის პროფესიული მომზადების პროგრამის მონაწილე იყო.

საქმის სასამართლო მასალების მიხედვით, პაიკი სლემერით მას შემდეგ დაინტერესდა, რაც ეჭვი გაუჩნდა, რომ ახალგაზრდა ქალი მის შეყვარებულთან, შიპთან, სასიყვარულო ურთიერთობის დამყარებას ცდილობდა. სასამართლოს ჩანაწერებში ასევე წერია, რომ მკვლელობამდე ერთი დღით ადრე პაიკმა თანაკურსელ კიმ ილოილოს უთხრა, რომ სლემერის მოკვლა სურდა.

მეორე საღამოს პაიკმა, შიპმა, პეტერსონმა და სლემერმა ერთად დატოვეს Job Corps-ის საცხოვრებელი. ისინი ნოქსვილის იზოლირებულ ტერიტორიაზე, ტენესის უნივერსიტეტის სასოფლო-სამეურნეო კამპუსთან ახლოს წავიდნენ. დაახლოებით ორი საათის შემდეგ პაიკი, შიპი და პეტერსონი უკან დაბრუნდნენ, ხოლო სლემერი მათთან ერთად აღარ იყო.

სასამართლოს მიერ დადგენილი ფაქტების მიხედვით, წამება დაახლოებით 30-45 წუთს გაგრძელდა. სლემერს სცემდნენ, ბასრი საგნებით ჭრილობებს აყენენდნენ და თავში მძიმე საგანს ურტყამდნენ. სასამართლოს ჩანაწერში აღნიშნულია, რომ მას სხეულზე, მათ შორის მკერდზე, პენტაგრამა ამოკვეთეს მაშინ, როდესაც ის ჯერ კიდევ ცოცხალი იყო.

პაიკმა მოგვიანებით თავის თანაკურსელ კიმ ილოილოს მოუყვა მკვლელობის შესახებ. სასამართლო მასალების თანახმად, მან თქვა, რომ სლემერს ყელი რამდენჯერმე გამოჭრა, შემდეგ კი თავში ასფალტის ნატეხს ურტყამდა. პაიკმა ასევე ილოილოს მსხვერპლის თავის ქალის ფრაგმენტი აჩვენა, რომელიც, მისი თქმით, მკვლელობის ადგილიდან „სუვენირად“ წამოიღო.

სლემერის ცხედარი 13 იანვარს აღმოაჩინეს ტენესის უნივერსიტეტის სასოფლო-სამეურნეო კამპუსის ტერიტორიაზე. პაიკი და მისი თანამზრახველები მალევე დააკავეს.