ისრაელელი მაღალჩინოსნის განაცხადა, რომ Flydubai-ის დუბაი-თელ-ავივის რეისთან დაკავშირებით, რომელმაც ბორტზე მომხდარი ინციდენტის შემდეგ საუდის არაბეთში საგანგებო დაშვება განახორციელა, „უმძიმესი კატასტროფა“ იქნა აცილებული.
Times of Israel-ის ცნობით, ისრაელელმა მაღალჩინოსანმა Channel 12-თან განაცხადა, რომ არსებობს საფუძველი ვარაუდისთვის, რომ თვითმფრინავის ერთ-ერთმა პილოტმა ბორტზე კონტროლის ხელში ჩაგდება და თვითმფრინავის ჩამოგდება სცადა. ამ ვერსიის ფარგლებში პილოტთან დაკავშირებით გამოძიება დაწყებულია.
მაღალჩინოსნის თქმით, პილოტის მცდელობა ბორტზე მყოფმა სამოქალაქო ტანსაცმელში ჩაცმულმა პილოტების ჯგუფმა აღკვეთა.
ინციდენტი Flydubai-ის FZ1073 რეისზე მოხდა, რომელიც დუბაიდან თელ-ავივში მიფრინავდა. ფრენისას თვითმფრინავმა საგანგებო სიგნალები გადასცა, მათ შორის ისიც, რომელიც შესაძლო გატაცებაზე მიუთითებს. ამის შემდეგ ბოინგი 737 საუდის არაბეთის ქალაქ ტაბუკისკენ გადამისამართდა და იქ უსაფრთხოდ დაეშვა.
Reuters-ის ინფორმაციით, ისრაელის ოფიციალურმა პირმა განაცხადა, რომ ინციდენტი თვითმფრინავის პილოტებს შორის ფიზიკურ დაპირისპირებას უკავშირდებოდა. Flydubai-მ დაადასტურა, რომ ბორტზე „ინციდენტი“ მოხდა და თვითმფრინავი ტაბუკში უსაფრთხოდ დაეშვა. ავიაკომპანიის ცნობით, ყველა მგზავრი და ეკიპაჟის წევრი უსაფრთხოდ არის.
ინციდენტის გამო ისრაელმა სამხედრო თვითმფრინავები ააფრინა, ხოლო პრემიერ-მინისტრ ბენიამინ ნეთანიაჰუს ოფისის განცხადებით, ვითარება კონტროლს ექვემდებარებოდა და მიმდინარეობდა მუშაობა ისრაელელი მგზავრების უსაფრთხოდ დასაბრუნებლად.
მედიაში გავრცელდა პირველი ფოტოები flydubai-ს რეისიდან, რომელზეც ჩანს პირი, სისხლიანი მაისურით.
