აშშ-ის პრეზიდენტმა დონალდ ტრამპმა არ დაადასტურა, დათანხმდა თუ არა უკრაინისთვის Patriot-ის საჰაერო თავდაცვის სისტემებისთვის განკუთვნილი რაკეტების წარმოების ლიცენზიის გაცემას.
CNN-ის ცნობით, ტრამპმა დაადასტურა, რომ ზელენსკისთან შეხვედრისას Patriot-ის რაკეტების საკითხი განიხილა, თუმცა უკრაინისთვის მათი წარმოების ლიცენზიის გაცემის შესახებ შეთანხმება არ დაუდასტურებია.
ზელენსკის განცხადებით, გაერო-ს გენერალური ასამბლეის ფარგლებში, ნიუ იორკში გამართულ შეხვედრაზე ტრამპმა უთხრა, რომ უკრაინა Patriot-ის რაკეტების წარმოების ლიცენზიას მიიღებდა.
ტრამპმა, თავის მხრივ, განაცხადა, რომ ზელენსკისთან ამ მნიშვნელოვან რაკეტებზე ისაუბრა, თუმცა კითხვაზე, გაფორმდა თუ არა შესაბამისი ლიცენზირების შეთანხმება, პასუხის ნაცვლად კვლავ უკრაინასა და რუსეთს შორის ომის დასრულების შესახებ შეთანხმების მიღწევის აუცილებლობაზე გაამახვილა ყურადღება.
„ჩვენ უამრავი სხვადასხვა საკითხი განვიხილეთ და ბევრ მათგანზე... სრულ ურთიერთგაგებას მივაღწიეთ. მაგრამ იცით, რა მინდა მისგან? მინდა, რომ შეთანხმებას მიაღწიოს. მინდა, მან პუტინთან მიაღწიოს შეთანხმებას, პუტინმა კი - მასთან“, - განაცხადა ტრამპმა.
Patriot-ის სისტემებისთვის განკუთვნილი ჩამჭრელი რაკეტენი იმ იარაღის სისტემებს შორისაა, რომლებსაც ბალისტიკური რაკეტების ჩამოგდება შეუძლიათ. ამ საბრძოლო მასალებზე გლობალურმა დეფიციტმა ათობით ქვეყანას საჰაერო თავდაცვის სისტემების გაძლიერებისკენ უბიძგა, რამაც უკრაინისთვის მათი მიწოდებაზეც იმოქმედა.
ზელენსკი აშშ-ისგან ამ რაკეტენის უკრაინაში წარმოების ნებართვას დიდი ხანია ითხოვს. საკითხი განსაკუთრებით აქტუალური გახდა მას შემდეგ, რაც ტრამპმა ივლისში განაცხადა, რომ უკრაინას Patriot-ის წარმოების ლიცენზიის მიცემის შესაძლებლობას განიხილავდა. მაშინ ტრამპმა თქვა, რომ აშშ უკრაინას „ლიცენზიას მისცემს“, რათა Patriot-ები თავად აწარმოოს.
25 სექტემბერს ზელენსკიმ განაცხადა, რომ ტრამპმა მას უთხრა, საბოლოო გადაწყვეტილება მიღებულია და უკრაინა Patriot-ის რაკეტების წარმოების ლიცენზიას მიიღებს. თუმცა, 26 სექტემბერს, CNN-ის კითხვაზე, დაადასტურებდა თუ არა ამ შეთანხმებას, ტრამპმა ამის პირდაპირი დადასტურებისგან თავი შეიკავა.
