უნგრეთის პრემიერ-მინისტრმა პეტერ მადიარმა განაცხადა, რომ ვიდრე მისი პარტია, „ტისა“ ხელისუფლებაშია, ქვეყანაში უკრაინისთვის განკუთვნილი ნავთობის საცავი არ აშენდება.
ამის შესახებ უნგრული მედია წერს.
საკითხი ორშაბათს უნგრეთის პარლამენტში განიხილეს. საუბარი შეეხებოდა უკრაინის სახელმწიფო კომპანია „ნაფტოგაზსა“ და უნგრულ ნავთობკომპანია MOL-ს შორის კვირას გაფორმებულ თანამშრომლობის შეთანხმებას, რომელიც უნგრეთში უკრაინის სტრატეგიული ნავთობის მარაგების შესაძლო შენახვას ითვალისწინებს.
„ვიდრე უნგრეთში „ტისას“ მთავრობა იქნება, უკრაინული ნავთობის საცავი არ აშენდება“, - განაცხადა მადიარმა.
მისი თქმით, MOL-მა უკრაინულ „ნაფტოგაზთან“ უნგრეთში ნავთობის შენახვის შესაძლებლობაზე მოლაპარაკებები ჯერ კიდევ ვიქტორ ორბანის მთავრობის დროს დაიწყო. თუმცა, მადიარის განცხადებით, მოქმედი ხელისუფლება მიუღებლად მიიჩნევს, რომ კომპანიამ უკრაინულ მხარესთან მთავრობის თანხმობის გარეშე აწარმოა მოლაპარაკებები.
მადიარმა ასევე განაცხადა, რომ ამის შესახებ MOL-ის ხელმძღვანელ ჟოლტ ჰერნადის წინა დღეს აცნობა და კომპანიის ქმედებები მიუღებლად შეაფასა. მისი თქმით, ელოდება, რომ MOL უნგრეთის სახელმწიფოს, როგორც კომპანიის 25%-იანი წილის მფლობელს, შესაბამის ანგარიშს გაუწევს.
თავის მხრივ, MOL-ში აცხადებენ, რომ პროექტი ჯერ იმდენად ადრეულ ეტაპზეა, რომ მის შესახებ მთავრობისთვის ინფორმაციის მიწოდების ეტაპამდეც კი არ მისულა. კომპანიის განმარტებით, ახლა მხოლოდ მოსამზადებელი პროცესი მიმდინარეობს, რომელიც შესაძლოა რამდენიმე წელი გაგრძელდეს და ტექნიკურ, ფინანსურ და მარეგულირებელ პირობებს მოიცავს.
MOL-ის განცხადებით, „ნაფტოგაზთან“ გაფორმებული განზრახვის დეკლარაცია შეესაბამება საერთაშორისო პრაქტიკას, რომლის ფარგლებშიც ევროპული ქვეყნები ერთმანეთს სტრატეგიული ნავთობისა და სხვა ნახშირწყალბადების მარაგების შენახვაში ეხმარებიან. კომპანიაში ასევე აღნიშნავენ, რომ უნგრეთში უკვე ინახავენ ევროკავშირის წევრი და არაწევრი ქვეყნების სტრატეგიული მარაგების ნაწილს.
კომპანიის ინფორმაციით, ამ ეტაპზე შეისწავლიან ტექნიკურ პირობებს, ფინანსურ შესაძლებლობებს, ასევე გარემოსდაცვით, უსაფრთხოებისა და მარეგულირებელ მოთხოვნებს. საბოლოო გადაწყვეტილება პროექტზე ამ ეტაპზე მიღებული არ არის.
