მაკრონი: ტრამპთან უკრაინასა და რუსეთს შორის ენერგეტიკულ ობიექტებზე დარტყმების მორატორიუმი განვიხილე
საფრანგეთის პრეზიდენტმა ემანუელ მაკრონმა განაცხადა, რომ აშშ-ის პრეზიდენტ დონალდ ტრამპთან უკრაინასა და რუსეთს შორის ენერგეტიკულ ობიექტებზე დარტყმების ურთიერთმორატორიუმის დაწესების ინიციატივები განიხილა.
ამის შესახებ Reuters მაკრონის განცხადებაზე დაყრდნობით წერს.
ტრამპთან შეხვედრის შემდეგ ჟურნალისტებთან საუბრისას მაკრონმა აღნიშნა, რომ მოლაპარაკებები „ძალიან კარგი“ და „ძალიან კონსტრუქციული“ იყო.
„ჩვენ დიდხანს განვიხილავდით უკრაინისა და რუსეთის საკითხებს, ასევე იმას, რომ უფრო სწრაფად და უფრო მეტი ძალისხმევით უნდა დავეხმაროთ ჩვენს უკრაინელ მეგობრებს ჩამჭერელი რაკეტებით, რადგან ეს თავდაცვის თვალსაზრისით საკვანძო საკითხია“, - განაცხადა მაკრონმა.
მისი თქმით, შეხვედრაზე ასევე განიხილეს ენერგეტიკულ სექტორზე დარტყმების შეწყვეტის საკითხები. მაკრონმა დეტალები არ დააკონკრეტა და აღნიშნა, რომ ამ საკითხის წამოჭრას უკრაინის პრეზიდენტ ვოლოდიმირ ზელენსკისთან შეხვედრისას გეგმავდა.
საფრანგეთის პრეზიდენტმა ხაზი გაუსვა, რომ უკრაინის ენერგოსისტემის მხარდაჭერა და დაცვა კვლავ მთავარი პრიორიტეტია, რადგან ომი ევროპაში სტაბილურობასა და უსაფრთხოებას კვლავ ძირს უთხრის.
