უკრაინის პრეზიდენტის ოფისის ხელმძღვანელმა კირილო ბუდანოვმა განაცხადა, რომ უკრაინა რუსეთის მიერ ოკუპირებულ ტერიტორიებზე უარს არ იტყვის, თუმცა ომის დასრულებას ცდილობს. მისი თქმით, თუ რუსეთი ომის შეწყვეტას არ დათანხმდება, უკრაინის დარტყმები რუსეთის ტერიტორიის სიღრმეში კიდევ უფრო გაძლიერდება.
ამის შესახებ ბუდანოვმა ლატვიურ მედიასთან ინტერვიუში განაცხადა.
ბუდანოვმა, კერძოდ, კომენტარი გააკეთა რუსეთის ღრმა ზურგში, უკრაინის ტერიტორიიდან დაახლოებით 3 000 კილომეტრის დაშორებით განხორციელებულ შორ მანძილზე მოქმედი დრონებით დარტყმაზე.
„თუ რუსეთი ჩვენს წინააღმდეგ საბრძოლო მოქმედებებს არ შეწყვეტს, ცხადია, ამას საკუთარ თავზე კიდევ უფრო მეტად და ძლიერად იგრძნობს. ჩვენი დარტყმები სულ უფრო ღრმა იქნება და მათი საბრძოლო ძალაც გაიზრდება“, - განაცხადა ბუდანოვმა.
ბუდანოვმა აღნიშნა, რომ უკრაინა ბრძოლას კვლავ გააგრძელებს.
„მას სხვა არჩევანი არ აქვს, რადგან ჩვენ ჩვენი ხალხისთვის, ჩვენი ტერიტორიისა და ჩვენი მომავლისთვის ვიბრძვით. რუსეთის ფედერაციას შეუძლია გადაწყვიტოს, უკან დაიხიოს თუ არა. ამ მხრივ მას მანევრირების გარკვეული შესაძლებლობა აქვს. ჩვენ საკუთარ მიწაზე ვართ და არავის აქვს უფლება, უბრალოდ აიღოს და სხვას გადასცეს ჩვენი მიწა“, - განაცხადა ბუდანოვმა.
ამასთან, მისი თქმით, უკრაინა ნებისმიერ მომენტში მზად არის ცეცხლის შეწყვეტისთვის.
„ეს უკრაინის პრეზიდენტის ოფიციალური პოზიციაა. ჩვენ მზად ვართ საბრძოლო მოქმედებების შესაწყვეტად. საკითხი რუსეთზეა დამოკიდებული. ეს უკრაინის აბსოლუტურად საჯარო, ღია და ოფიციალური პოზიციაა. ჩვენ მზად ვართ და ვისწრაფვით ომის დასრულებისკენ. რა თქმა უნდა, ნორმალური და მისაღები პირობებით და არა ულტიმატუმის ფორმით - „ყველაფერი გადმოგვეცით და თან კიდევ ჩვენთან ვალში დარჩებით“, - აღნიშნა ბუდანოვმა.
ამასთან, მან საკუთარი ხედვაც გააჟღერა იმის შესახებ, თუ რა პირობებში იქნება შესაძლებელი რუსეთთან რაიმე საკითხზე შეთანხმება.
„ჩემი სუბიექტური მოსაზრებით, ომის დასრულების ან, სულ მცირე, საბრძოლო მოქმედებების შეწყვეტის ყველაზე რეალისტური ვარიანტი, უკრაინის უსაფრთხოების გარანტიების არსებობის შემთხვევაში, შეთანხმების მიღწევის დღეს არსებული ფაქტობრივი ფრონტის ხაზია. რა თქმა უნდა, უკრაინის მხრიდან ყოველგვარი იურიდიული აღიარების გარეშე, ანუ ტერიტორიებზე უარის თქმის გარეშე. ასეთი რამ არ იქნება და ამას არავინ გააკეთებს“, - განაცხადა პრეზიდენტის ოფისის ხელმძღვანელმა.
ამასთან, ბუდანოვი იმედოვნებს, რომ ომის დასრულების გზების ძიების მიზნით, აშშ-ის შუამავლობით დიპლომატიური ძალისხმევის განახლების შემდეგ, შეთანხმების მიღწევა შესაძლებელი გახდება.
„ვხედავთ, რომ ამერიკულ მხარეს ამის სურვილი აქვს. უკრაინული მხარეც მკაფიოდ აცხადებს, რომ ამას ისწრაფვის. საკითხავია, რამდენად არის ამისთვის რეალურად მზად რუსეთის მხარე. ამას დრო გვიჩვენებს“, - განაცხადა ბუდანოვმა.
