კრაინის პრეზიდენტი ვოლოდიმირ ზელენსკი რუსული ძალების მიერ უკრაინაზე ღამით განხორციელებულ თავდასხმას სოციალურ ქსელში ეხმიანება.
როგორც ზელენსკი წერს, ფრთოსანი რაკეტების წინააღმდეგ ძალიან კარგი შედეგები აქვთ, თუმცა ბალისტიკური რაკეტების მოგერიება კვლავ რთულია.
"კიევსა და კიევის ოლქში, ისევე როგორც ბევრ სხვა რეგიონში, რუსეთის მიერ განხორციელებული იერიშის შედეგების აღმოსაფხვრელად მუშაობა გუშინ ღამიდან მიმდინარეობს.
ეს იყო კომპლექსური თავდასხმა, რომლის დაგეგმვისას რუსეთი ცდილობდა, ადამიანებისთვის მაქსიმალური ზიანი მიეყენებინა - გამოყენებული იყო ბალისტიკური და ფრთოსანი რაკეტები, ხომალდსაწინააღმდეგო რაკეტები და რეაქტიული ძრავით აღჭურვილი „შაჰედები“.
დედაქალაქში საცხოვრებელი სახლები და სხვა სამოქალაქო ინფრასტრუქტურა მნიშვნელოვნად დაზიანდა. ამ დროისთვის ცნობილია 10 დაშავებულის შესახებ. ყველა, ვისაც სამედიცინო დახმარება სჭირდება, შესაბამის დახმარებას იღებს. უკრაინის საგანგებო სიტუაციების სახელმწიფო სამსახურის თანამშრომლებმა 13 ადამიანის გადარჩენა შეძლეს.
სამწუხაროდ, დაიღუპა ორი ადამიანი. ვუსამძიმრებ მათ ოჯახებსა და ახლობლებს.
კიევის ოლქში იერიში კრიტიკულ ინფრასტრუქტურაზე განხორციელდა. ოდესის ოლქში კი სამიზნე ჩვეულებრივი ბაზარი გახდა. ხარკოვში ორი ადამიანი დაშავდა და საცხოვრებელი კორპუსი დაზიანდა.
დილით სუმის ოლქში, რკინიგზის სადგურზე, კიევი–სუმის მატარებლის ლოკომოტივს დაესხნენ თავს. საბედნიეროდ, არავინ დაშავებულა. ამჟამად მიმდინარეობს მოსახლეობის ევაკუაცია.
თავდასხმის სამიზნეები ასევე იყო ზაპოროჟიესა და დნიპროპეტროვსკის ოლქები.
საერთო ჯამში, ჩვენმა სამხედროებმა ღამით 175 საჰაერო სამიზნე ჩამოაგდეს, თუმცა, სამწუხაროდ, ყველა მათგანის განადგურება ვერ მოხერხდა.
ფრთოსანი რაკეტების წინააღმდეგ ძალიან კარგი შედეგები გვაქვს, თუმცა ბალისტიკური რაკეტების მოგერიება კვლავ განსაკუთრებით რთულია. პარტნიორებს ყოველდღიურად ვაწვდით ცნობას, რომ უკრაინას რაკეტსაწინააღმდეგო საშუალებები ესაჭიროება.
ამ საკითხზე უკვე ვიმსჯელეთ ამერიკელ და ევროპელ პარტნიორებთან და შეხვედრები გაგრძელდება, მათ შორის დღესაც, იმ ქვეყნების წარმომადგენლებთან და კომპანიებთან, რომლებსაც შეუძლიათ დახმარება გაგვიწიონ როგორც საჭირო შეიარაღების მიწოდებაში, ისე ჩვენს რაკეტსაწინააღმდეგო სისტემასთან - FREYJA-სთან დაკავშირებით.
მადლობას ვუხდი ყველა პარტნიორს, რომელიც უკრაინის საჰაერო თავდაცვის მხარდაჭერას პრიორიტეტად მიიჩნევს. ეს პირდაპირ ნიშნავს ადამიანების სიცოცხლის გადარჩენას", - წერს ზელენსკი.
