საუბარი როდესაც არის პასუხის გაცემაზე და იმაზე, რომ მეორე მხარეს, შენს ოპონენტს კრიტიკული ან განსხვავებული აზრი აქვს, ამ შემთხვევაში ყველაზე სწორი გზაა, კრიტიკას შენი არგუმენტირებული პოზიციით უპასუხო, – ამის შესახებ საქართველოს პარლამენტის თვითმმართველობის კომიტეტის თავმჯდომარემ, ირაკლი ქადაგიშვილმა განაცხადა.
ქადაგიშვილის თქმით, აქ საქმე არ არის არც კრიტიკასთან, არც აზრის გამოხატვასთან, არც მსჯელობასთან და არც კამათთან, საქმე არის ბილწსიტყვაობასთან.
„ბილწსიტყვაობა დასჯადი ქმედებაა. საზოგადოებისთვის აბსოლუტურად მიუღებელია, რომ ბილწსიტყვაობა გახდეს საზოგადოებაზე ზემოქმედების, მისი დაშლის, დათრგუნვისა და დემორალიზაციის იარაღი. რატომ არის გინება აკრძალული? როდესაც ერთი ადამიანი მეორეს აგინებს, ეს დემორალიზაციას, ბულინგსა და ფსიქოლოგიურ განადგურებას იწვევს. აქედან გამომდინარე, ბილწსიტყვაობა, გინება და დემორალიზაცია სოციალურ ქსელებში არის ანალოგიური, ოღონდ გაცილებით უფრო დიდი მასშტაბის შეტევა საზოგადოებაზე. ამიტომ ბილწსიტყვაობას გასაქანი ვერ ექნება.
რაც შეეხება იმას, რომ ვიღაცას ბილწ სიტყვასა და თავისუფალ სიტყვას შორის ტოლობის ნიშნის დასმა სურს, ეს ინტელექტუალური დეგრადაციაა. ჩვენ ყოველთვის ვიქნებით თავისუფალი სიტყვის მხარდამჭერები, მაგრამ ყოველთვის ვიქნებით ბილწსიტყვაობის წინააღმდეგი“, – განაცხადა ირაკლი ქადაგიშვილმა.
ამასთან, ქადაგიშვილს კითხვა დაუსვეს „რადიო თავისუფლების“ მიერ გავრცელებულ აშშ-ის საელჩოს განცხადებაზე, რომლის მიხედვითაც, „საელჩო შეშფოთებას გამოთქვამს სიძულვილის ენის წინააღმდეგ ბრძოლის სამმართველოს გამო“.
„ამერიკის შეერთებულ შტატებს რაც შეეხება, ზედმეტ პოლემიკაში შესვლას არ ვაპირებთ, რადგან ჩვენთან მედიათავისუფლება საკმაოდ განვითარებული და დაცულია. დღევანდელი ამერიკის ვითარებასთან დაკავშირებით, შეიძლება, ბევრი საინტერესო პარალელიც კი გავავლოთ, რადგან ჩვენ ამერიკასთან სრულიად სხვა, პოზიტიური დღის წესრიგის განვითარება გვსურს“, – აღნიშნა ქადაგიშვილმა.
