კაპიტანმა გიგაურმა სააკაშვილი პოლიტპატიმართა სიაში არ შეიყვანა. „ქართული ოცნების“ მმართველობის დროს საქართველოს პოლიტპატიმრები არც ჰყოლია და არც ეყოლება, – ამის შესახებ პარლამენტის დიასპორის საკითხთა კომიტეტის თავმჯდომარემ ირაკლი ზარქუამ განაცხადა.
ზარქუას თქმით, თითოეული ადამიანი სასჯელს იხდის კონკრეტული დანაშაულების გამო, რომელიც დამტკიცებულია.
„ეტყობა, კაპიტანმა გიგაურმა რა სიაც მიიღო, იქ სააკაშვილი არ ეწერა – იქიდანაც კი ჩამოწერილია, მას სერიოზულად არ აღიქვამენ. მგონი, უკვე ბელადის აღზევება წარსულს ჰბარდება. ამ კაცმა რა ქნას, არც აქანა მიიღონ, არც იქანა დარჩეს. ასე დარჩა, ლუზერად. საკუთარი ქვეყნისა და ხალხის წინააღმდეგ როცა გაილაშქრებ, შენებიც კი მიგატოვებენ, რადგან ჩამოწერილი, ლუზერი კაცი არავის სჭირდება. მგონი, სააკაშვილს მხოლოდ ქალბატონი ნანულა შერჩა“, – აღნიშნა ირაკლი ზარქუამ.
შეგახსენებთ, საქართველოს ყოფილმა პრეზიდენტმა, მიხეილ სააკაშვილმა სოციალურ ქსელში დაწერა: „სრულიად სამარცხვინოდ, „ქართულმა საერთაშორისო გამჭვირვალობამ“ არ შემიყვანა პოლიტპატიმართა სიაში, იმედია, გამოჩნდებიან პატიოსანი არასამთავრობოებიც, რომლებიც ამ უსამართლობაზე ხმას ამოიღებენ“.
სააკაშვილის თქმით, სწორედ ამ სიჩუმით არასამთავრობო ორგანიზაციებს დიდი წვლილი აქვთ შეტანილი დიქტატურის ჩამოყალიბებაში.
