დაცული ტერიტორიებისთვის გამოყოფილი გრანტების რაოდენობა იზრდება. დაცული ტერიტორიების სააგენტოს ინფორმაციით, 3,5 მლნ. ევროს დაფინანსება საქართველოს, აზერბაიჯანის და სომხეთის დაცული ტერიტორიებისთვის დაიხარჯება
გარემოს დაცვის და ბუნებრივი რესურსების მინისტრის მოადგილე გიორგი ზედგინიძე, დაცული ტერიტორიების სააგენტოს თავმჯდომარე გიორგი შონვაძე და გაერთიანებული სამდივნოს (TJS) პროგრამის ხელმძღვანელი იაპ ფერმატი გარემოს დაცვის სამინისტროში გამართულ შეხვედრას დაესწრნენ.
შეხვედრაზე მხარეებმა საქართველოში პროგრამის პირველი ეტაპის წარმატებით დასრულება და მეორე ფაზის დაწყება განიხილეს. საქართველოს, აზერბაიჯანის და სომხეთის დაცული ტერიტორიებისთვის გამოყოფილი 3,5 მლნ. ევროს დაფინანსება დაცული ტერიტორიების სააგენტოს მიერ წარდგენილ პრიორიტეტულ მიმართულებებზე დაიხარჯება.
`საქართველოსთან ფინანსური თანამშრომლობა, ბუნების დაცვის პროგრამა კავკასიაში - საქართველო, გაერთიანებული სამდივნო, მეორე ფაზა~ 2011 წელს დაიწყო და 3 წლის განმავლობაში გაგრძელდება. პროგრამის მიზანია დაცულ ტერიტორიებზე ბუნების კონსერვაციის და ადგილობრივი მოსახლეობის სოცალურ-ეკონომიკური განვითარების ხელშეწყობა.
შეგახსენებთ, რომ ტრანსსასაზღვრო გაერთიანებული სამდივნო (TJS) დაცული ტერიტორიების სააგენტოს პარტნიორი ორგანიზაციაა. ის შეიქმნა საქართველოს, აზერბაიჯანის და სომხეთის დაცული ტერიტორიების სისტემის მხარდაჭერის მიზნით. მისი დონორია გერმანიის რეკოსტრუქციის საკრედიტო ბანკი (KFW).