CBS News-ის ინფორმაციით, აშშ-ის სამხედრო ხელმძღვანელობამ ბოლო კვირებში კუბასთან მიმართებით მოქმედების რამდენიმე შესაძლო ვარიანტი შეისწავლა, მათ შორის ფართომასშტაბიანი საჰაერო-სადესანტო ოპერაცია, რომელშიც შესაძლოა ათასობით ამერიკელი სამხედრო ყოფილიყო ჩართული.
ტელეარხის წყაროების ცნობით, მას შემდეგ, რაც აშშ-სა და ირანს შორის ომი განახლდა, პენტაგონმა ყურადღება კუბასთან დაკავშირებულ ვითარებასაც დაუთმო. სამხედრო დაგეგმარების პროცესში განხილულ შესაძლო სცენარებს შორის იყო აშშ-ის სახმელეთო ძალების ხელმძღვანელობით საჰაერო-სადესანტო ოპერაცია, რომელშიც მონაწილეობას მიიღებდა 101-ე საჰაერო-სადესანტო დივიზია - ამერიკული არმიის ერთადერთი დანაყოფი, რომელიც მსგავსი ტიპის მისიისთვის არის მომზადებული.
ამავე დროს, ოფიციალურმა პირებმა ხაზგასმით აღნიშნეს, რომ ჩატარებული ბრიფინგები სამხედრო დაგეგმვის სტანდარტული პროცესის ნაწილი იყო და არ ნიშნავს, რომ ოპერაციის ჩატარების შესახებ პოლიტიკური გადაწყვეტილება უკვე მიღებულია.
„გასული თვის ბოლოს ამერიკელმა სამხედროებმა ჩაატარეს ოპერაციების კონცეფციის შესახებ ბრიფინგი, რომლის დროსაც განიხილებოდა ცალკეული მისიების ადრეული სამხედრო დაგეგმვის ვარიანტები“, - ნათქვამია CBS News-ის ინფორმაციაში.
წყაროების განცხადებით, ამ ეტაპზე კუბის წინააღმდეგ რაიმე ოპერაციის განხორციელება ნაკლებად სავარაუდოა, რადგან აშშ-ის სამხედრო რესურსების მნიშვნელოვანი ნაწილი უკვე გადაისროლეს ახლო აღმოსავლეთში ირანის წინააღმდეგ მიმდინარე ოპერაციების მხარდასაჭერად.
