აშშ-ის პრეზიდენტმა დონალდ ტრამპმა განაცხადა, რომ ირანმა გაათავისუფლა ამერიკის მოქალაქე, რომელიც, მისი თქმით, 2024 წლის დეკემბრიდან იყო დაკავებული.
„ირანმა ამერიკის მოქალაქეს, რომელიც 2024 წლის დეკემბერში, მძინარე ჯო ბაიდენის „პრეზიდენტობის“ პერიოდში უსამართლოდ დააკავეს, ქვეყნის დატოვების უფლება მისცა.
ამჟამად ის ირანის ფარგლებს გარეთ, უსაფრთხოდ იმყოფება და მისი ჯანმრთელობის მდგომარეობა დამაკმაყოფილებელია. ამერიკის შეერთებული შტატები ირანის ამ კეთილი ნების ჟესტს აფასებს,“ - დაწერა ტრამპმა Truth Social-ში.
ტრამპს გათავისუფლებული ქალის ვინაობა არ დაუსახელებია და არც მისი გათავისუფლების გარემოებებზე უსაუბრია.
მოგვიანებით ქალის ადვოკატმა განაცხადა, რომ გათავისუფლებული ამერიკის მოქალაქეა დენა კარარი.
„მოხარული და ბედნიერი ვარ გაცნობოთ, რომ ჩემი კლიენტი, აშშ-ის მოქალაქე დენა კარარი, რომელიც 2024 წლის დეკემბრიდან ირანში შეთითხნილი ბრალდებებით ტყვეობაში იმყოფებოდა, თავისუფალია,“ - დაწერა X-ზე ადვოკატმა ჯარედ გენსერმა.
მან მადლობა გადაუხადა აშშ-ის პრეზიდენტ დონალდ ტრამპს და აღნიშნა, რომ მისი კლიენტი „ამჟამად უსაფრთხოდაა და ამერიკის შეერთებულ შტატებში ბრუნდება“.
