15 ივლისის დილით კიევში ევროპის რამდენიმე სახელმწიფოს ლიდერი ჩავიდა.
ამის შესახებ უკრაინის საგარეო საქმეთა მინისტრმა ანდრი სიბიჰამ სოციალურ ქსელ X-ზე დაწერა.
„კიევი უკრაინის სახელმწიფოებრიობის დღეს პატივცემულ სტუმრებს მასპინძლობს. ევროკომისიის პრეზიდენტი ურსულა ფონ დერ ლაიენი და სამხრეთ-აღმოსავლეთ ევროპის ლიდერები პრეზიდენტ ვოლოდიმირ ზელენსკის შეხვდებიან ნაყოფიერი მოლაპარაკებებისთვის.“ - წერს სიბიჰა.
კიევში ჩავიდნენ: რუმინეთის პრეზიდენტი ნიკუშორ დანი, მოლდოვის პრეზიდენტი მაია სანდუ, სერბეთის პრეზიდენტი ალექსანდარ ვუჩიჩი, ხორვატიის პრემიერ მინისტრი ანდრეი პლენკოვიჩი, ალბანეთის პრეზიდენტი ბაირამ ბეგაი, სლოვენიის პრემიერ-მინისტრი იანეზ იანშა.
კიევში, სადაც გაიმართება „სამხრეთ-აღმოსავლეთ ევროპა - უკრაინის“ სამიტი, ასევე ჩავიდნენ მაკედონიისა და მონტენეგროს წარმომადგენლები., მაკედონიის საგარეო საქმეთა მინისტრი ნიკოლა დიმიტროვი და მონტენეგროს საგარეო და ევროპულ საკითხებში ვიცე-პრემიერი ფილიპ ივანოვიჩი.
აღინიშნება, რომ ყველა მათგანი კიევში ჩავიდა „სამხრეთ-აღმოსავლეთ ევროპა- უკრაინის“ სამიტში მონაწილეობის მისაღებად, რომლის ჩატარების თარიღი და ადგილი ამ დრომდე საჯაროდ არ გავრცელებულა.
უკრაინის საგარეო საქმეთა მინისტრმა ანდრი სიბიჰამ განაცხადა, რომ სამიტის მთავარი თემები იქნება „ევროპის გაძლიერების მიზნით ერთობლივი მუშაობა, მრავალმხრივი პოლიტიკური თანამშრომლობა და უსაფრთხოებისა და თავდაცვის სფეროში თანამშრომლობის გაძლიერება“.
2025 წელს ამ ფორმატის მეოთხე მსგავსი სამიტი ოდესაში გაიმართა, ხოლო წინა შეხვედრა - ხორვატიის ქალაქ დუბროვნიკში.
