აშშ-ის პრეზიდენტ დონალდ ტრამპის განცხადებით,ჰორმუზის სრუტის გამოყენების სანაცვლოდ 20%-იანი გადასახადის დაწესებაზე უარს იტყვის.
მისი თქმით, გადაწყვიტა 20%-იანი გადასახადი ჩაანაცვლოს სავაჭრო და საინვესტიციო შეთანხმებებით, რომლებსაც სპარსეთის ყურის სხვადასხვა ქვეყნები შეერთებულ შტატებთან „გააფორმებენ“.
ამასთან, დონალდ ტრამპმა აღნიშნა, რომ ჰორმუზის სრუტეში ყველა ქვეყნის გემი შეძლებს გავლას, გარდა ირანულისა.
"ჩვენ გვექნება სრული ბლოკადა, მაგრამ მხოლოდ იმ გემებზე, რომლებიც ირანის პორტებში შემოდიან და იქიდან გამოდიან, ან ირანულ ტვირთთან დაკავშირებულ რამეს გადაიტანენ. ახლო აღმოსავლეთის ხელმძღვანელობასთან უაღრესად პროდუქტიული საუბრების საფუძველზე, გადავწყვიტე, შეერთებული შტატების 20%-იანი ანაზღაურების საფასური ჩავანაცვლო სავაჭრო და საინვესტიციო გარიგებებით, რომლებსაც სპარსეთის ყურის სხვადასხვა სახელმწიფოები შეერთებულ შტატებში ჩადებენ“, – განაცხადა მან.
ტრამპის თქმით, აღნიშნული ინვესტიციები შტატების ეკონომიკას მნიშვნელოვნად გაზრდის, გაიხსნება ახალი ქარხნები და სულ უფრო მეტი ადამიანი დასაქმდება. თეთრი სახლის ლიდერმა კიდევ ერთხელ გაიმეორა, რომ არ დაუშვებს, თეირანს ბირთვული იარაღი ჰქონდეს.
„ჩვენ ვიხილავთ, როგორ შემოვა ქარხნები, საწარმოები და აღჭურვილობა შეერთებულ შტატებში ისტორიულ დონემდე, რაც დამატებით მილიონობით მაღალანაზღაურებად სამუშაო ადგილს შექმნის. ამერიკა კვლავ იმარჯვებს, იმარჯვებს ისე, როგორც არასდროს. ირანის მიერ ასობით ათასი ადამიანის, მათ შორის 52 000 მომიტინგის, მკვლელობის დღეები დასრულდა, რაც მთავარია, ირანს არასდროს ექნება ბირთვული იარაღი“, – წერს ტრამპი.
