ევროკავშირი სომხეთს ჰიბრიდული საფრთხეებისადმი მდგრადობის გაძლიერებასა და უსაფრთხოების გამოწვევებზე რეაგირების შესაძლებლობების განვითარებაში დაეხმარება.
13 ივლისს ევროკავშირის საბჭომ ოფიციალურად გამოაცხადა სომხეთში ევროკავშირის სამოქალაქო პარტნიორობის მისიის (EUPM Armenia) ამოქმედების შესახებ. მისია საკონსულტაციო ხასიათის იქნება და ორი წლის განმავლობაში იმუშავებს.
"ევროკავშირი სომხეთში ჰიბრიდული საფრთხეების წინააღმდეგ ბრძოლის მიზნით მისიას გაგზავნის". – განაცხადა ევროკავშირის საგარეო საქმეთა და უსაფრთხოების პოლიტიკის უმაღლესმა წარმომადგენელმა, კაია კალასმა.
მისიის შექმნის შესახებ ოფიციალურად აპრილში გამოცხადდა. იგი ივნისში ჩატარებული საპარლამენტო არჩევნების პერიოდში მოქმედი მოკლევადიანი სადამკვირვებლო მისიის გაგრძელება იქნება.
მისიის ფარგლებში, რომელსაც რუმინელი დიპლომატი კოსმინ დინესკუ უხელმძღვანელებს, სხვადასხვა ღონისძიების განსახორციელებლად სპეციალური საპროექტო ჯგუფი შეიქმნება.
ერევანი მიიღებს სტრატეგიულ კონსულტაციებს, პრაქტიკულ ოპერატიულ რეკომენდაციებს, ტექნიკურ ექსპერტიზასა და დახმარებას სახელმწიფო უწყებების შესაძლებლობების გასაძლიერებლად. მხარდაჭერა მოიცავს კიბერსაფრთხეებთან ბრძოლას, ინფორმაციის მანიპულირების წინააღმდეგ მოქმედებასა და უკანონო ფინანსური ნაკადების აღკვეთას.
ევროკავშირის საგარეო საქმეთა და უსაფრთხოების პოლიტიკის უმაღლესმა წარმომადგენელმა კაია კალასმა განაცხადა, რომ ევროკავშირი „მდგრადი და დამოუკიდებელი სომხეთის, ასევე სომეხი ხალხის უფლების მთავარი მხარდამჭერია და მან თავად განსაზღვროს საკუთარი მომავალი.“
„ჩვენ ვიზრუნებთ, რომ სომხეთი გარე ზეწოლის პირისპირ მარტო არ დარჩეს“, - აღნიშნა კალასმა.
მისია ევროკავშირის უფრო ფართო ძალისხმევის ნაწილია, რომელიც სომხეთის უსაფრთხოების, მდგრადობისა და ინსტიტუციური შესაძლებლობების გაძლიერებას ისახავს მიზნად.
