რუსეთის მართლმადიდებელი ეკლესიის პატრიარქის, კირილისა და რუსული ნავთობკომპანიის, „ლუკოილის“ დამფუძნებლის, ვაგიტ ალეკპეროვის სახელები ევროკავშირის მიერ რუსეთის წინააღმდეგ მომზადებული სანქციების 21-ე პაკეტის პროექტიდან ამოიღეს.
ამის შესახებ უკრაინული გამიოცემა „ევროპეისკა პრავდა“, ევროკავშირის დიპლომატიურ წყაროებზე დაყრდნობით იუწყება.
დიპლომატების ინფორმაციით, პატრიარქი კირილი და ვაგიტ ალეკპეროვი სანქციების პროექტიდან ბულგარეთის მოთხოვნით ამოიღეს.
ამასთან, ცნობილი გახდა, რომ სანქციების პაკეტის ყველაზე სადავო საკითხებზე შეთანხმება უკვე მიღწეულია და უმეტეს შემთხვევაში შეზღუდვების შემსუბუქების მიმართულებით.
კერძოდ:
ევროკავშირში რუსი მებრძოლების შესვლის აკრძალვა მნიშვნელოვნად შეიზღუდება;
პაკეტიდან სრულად ამოიღებენ ევროკავშირში ვირთევზას, მინტაისა და თევზის სხვა სახეობების იმპორტის აკრძალვის წინადადებას;
ასევე აღარ განხორციელდება რუსული თხევადი ბუნებრივი აირის (LNG) და მისი გადამზიდავი ტანკერების მიმართ მკაცრი შეზღუდვების დაწესების გეგმა.
დადებით სიახლედ სახელდება ევროკავშირის წევრი სახელმწიფოების პრინციპული შეთანხმება, რომლის მიხედვითაც რუსულ ნავთობზე ფასის ზედა ზღვარი დროებით 44,1 დოლარის დონეზე, ერთ ბარელზე, დაფიქსირდება.
გადაუჭრელ საკითხებს შორის რჩება ავსტრიის მოთხოვნა, რომელიც ევროკავშირის მუდმივი წარმომადგენლების კომიტეტის 10 ივლისის სხდომის შემდეგ კვლავ წამოაყენა.
ვენა მოითხოვს, რუსული საინვესტიციო კომპანია Rasperia-სთვის სანქციების მოხსნასა და მისი აქტივების განბლოკვას.
Rasperia დაკავშირებულია რუს ოლიგარქ ოლეგ დერიპასკასთან და მილიარდობით დოლარის ოდენობის სარჩელები აქვს შეტანილი ავსტრიული ბანკის Raiffeisen-ის შვილობილი კომპანიის წინააღმდეგ.
