აშშ-ის პრეზიდენტმა დონალდ ტრამპმა განაცხადა, რომ სენატორ ლინდსი გრემს გარდაცვალებამდე რამდენიმე საათით ადრე ესაუბრა.
ამის შესახებ მან NBC-ის ეთერში განაცხადა.
„დაღლილობის გარდა, თავს ნორმალურად გრძნობდა,“ - თქვა ტრამპმა.
აშშ-ის პრეზიდენტის თქმით, სენატორი გრემი სწრაფად გარდაიცვალა.
„შესაძლოა, ეს სიცოცხლის დასრულების ყველაზე ცუდი გზა არ იყოს,“ - დასძინა ტრამპმა.
ტრამპმა ჟურნალისტებთან საუბრისას აღნიშნა, რომ გარდაცვლილი სენატორი მისი ახლო მოკავშირე იყო. მისი თქმით, ლინდსი გრემი მისთვის „ოჯახის წევრივით“ იყო.
აშშ-ის პრეზიდენტმა ასევე თქვა, რომ გრემთან რეგულარულად საუბრობდა ტელეფონით და მასთან ერთად გოლფსაც თამაშობდა. ტრამპმა გაიხსენა, რომ გარდაცვალებამდე ცოტა ხნით ადრე სენატორი უკრაინიდან დაბრუნდა.
პრეზიდენტის თქმით, სიკვდილამდე ცოტა ხნით ადრე გრემმა მას დაურეკა, რათა განეხილათ SAVE America Act-ის კანონპროექტი, რომელიც არჩევნების ჩატარების წესის შეცვლას ითვალისწინებს, თუმცა ამ ეტაპზე სენატში მის მისაღებად საკმარისი მხარდაჭერა არ აქვს.
„მან მითხრა, რომ დაღლილი იყო, თუმცა ძალიან სურდა, რომ კანონპროექტი SAVE America Act მიღებულიყო. მე კი ვუპასუხე: „ამას გავაკეთებთ, ლინდსი. აუცილებლად გავაკეთებთ. მალე შევხვდებით“. ორივე ვფიქრობდით, რომ დღეს, 12 ივლისს, შევხვდებოდით,“ - განაცხადა ტრამპმა.
