უკრაინული დრონების თავდასხმების შედეგად რუსეთის მსხვილი ნავთობგადამამუშავებელი ქარხნების გაჩერების შემდეგ ქვეყანაში ბენზინის წარმოება სეზონური საშუალო მოხმარების მხოლოდ დაახლოებით 65%-ს შეადგენს.
ამის შესახებ Reuters იუწყება.
უკრაინის თავდასხმების გამო მუშაობა შეაჩერა არაერთმა ნავთობგადამამუშავებელმა ქარხანამ, მათ შორის რუსეთის ბენზინის ორმა უმსხვილეს მწარმოებელმა NORSI-მ და ომსკის ნავთობგადამამუშავებელმა ქარხანამ. წარმოება ასევე შეაჩერა კიდევ ერთმა მსხვილმა საწარმომ - სარატოვის ნავთობგადამამუშავებელმა ქარხანამ.
ზაფხულის სეზონზე საწვავზე მოთხოვნა დღეში 40–45 ათასი ტონით, ანუ დაახლოებით 35%-ით იზრდება, თუმცა რუსეთი ამ მოთხოვნის დასაკმაყოფილებლად საჭირო რაოდენობის საწვავის წარმოებას ვეღარ ახერხებს.
თუ ივნისში ბენზინის ყოველდღიური დეფიციტი დაახლოებით 25% იყო, ახლა წარმოება სეზონურ მოთხოვნასთან შედარებით მხოლოდ 65%-ს აღწევს.
Reuters-ის წყაროების ცნობით, ზაფხულის პიკური სეზონის პერიოდში რუსეთში ბენზინზე ყოველდღიური მოთხოვნა 115–120 ათას ტონას შეადგენს.
საწვავის დეფიციტის დასაძლევად რუსეთის მთავრობა განიხილავს დიზელის, ბენზინისა და საავიაციო საწვავის ექსპორტის აკრძალვას.
ამასთან, რუსეთმა საწვავის იმპორტიც დაიწყო. ივნისში ბელარუსიდან რუსეთში ბენზინისა და დიზელის მიწოდებამ თვის განმავლობაში რეკორდულ მაჩვენებელს მიაღწია, ხოლო გასულ კვირას Reuters-ის წყაროებმა განაცხადეს, რომ რუსეთმა ინდოეთიდან საზღვაო გზით საწვავის იმპორტიც დაიწყო.
