რუსეთის ბაზარზე საწვავის დეფიციტია, რაც უკრაინული დრონების დარტყმების გამო ნავთობგადამამუშავებელი ქარხნების სარემონტო სამუშაოებით არის გამოწვეული, - რუსული მედიის ცნობით, ამის შესახებ რუსეთის ვიცე-პრემიერმა ალექსანდრ ნოვაკმა განაცხადა .
ნოვაკის განცხადებით, უნდა აღიარონ, რომ საწვავის ბაზარზე ამჟამად პრობლემები და დეფიციტია, რის გამოც ხელისუფლება ავტოგასამართ სადგურებთან რიგებს ხედავს.
ნოვაკმა ხაზი გაუსვა, რომ არსებული ვითარების მიზეზები გასაგებია და პრობლემა წარმოიშვა იმის გამო, რომ რუსეთის ნავთობგადამამუშავებელი ქარხნები ნაწილობრივ გამოდიან მწყობრიდან და სარემონტო სამუშაოებზე გადადიან.
„უნდა ვაღიაროთ, რომ[ საწვავის ბაზარზე] არის პრობლემები და არის დეფიციტი, რის გამოც რიგებს ვხედავთ. ან ხანდახან ბენზინგასამართი სადგურები არასტაბილურად მუშაობენ. დეფიციტი გასაგების მიზეზების გამო [გაჩნდა], იმის გამო, რომ ჩვენი ნავთობგადამამუშავებელი ქარხნები ნაწილობრივ მწყობრიდან გამოდიან რემონტისთვის [დრონების] მოხვედრის გამო“, - განაცხადა ნოვაკმა.
