უკრაინის შეიარაღებული ძალების მთავარსარდალმა ოლექსანდრ სირსკიმ განაცხადა, რომ 2026 წლის პირველ ნახევარში ფრონტზე რუსეთის სამხედრო ძალების წინსვლის ტემპი ორჯერ მეტად შენელდა, ხოლო მოწინააღმდეგის საშუალო თვიური დანაკარგი დაღუპულებისა და დაჭრილების სახით დაახლოებით 32 ათას სამხედრო მოსამსახურეს შეადგენს.
„მოწინააღმდეგე ცდილობდა ფართომასშტაბიანი შეტევის განვითარებას, თუმცა რეალურად ვერ შეძლო დასახული ვერც ერთი მიზნის მიღწევა, მიუხედავად ცოცხალ ძალასა და ტექნიკაში თითქმის ორმაგი უპირატესობისა. თუ ადრე რუსეთის არმია აქტიურ შეტევით მოქმედებებს 13 ოპერატიულ მიმართულებაზე ახორციელებდა, ახლა ასეთი მიმართულებების რაოდენობა მაქსიმუმ ექვს-შვიდამდე შემცირდა“, - განაცხადა სირსკიმ.
სირსკის განცხადებით, უკრაინის ჯარები აგრძელებენ თავდაცვით ოპერაციას, რომელსაც აერთიანებენ სტაბილიზაციის ღონისძიებებთან, ხოლო ცალკეულ მიმართულებებზე აქტიურ მოქმედებებს ახორციელებენ და ოპერატიულ ინიციატივას ინარჩუნებენ.
„ამჟამად ჩვენი შეტევითი მოქმედებებისა და მოწინააღმდეგის მოქმედებების თანაფარდობა დაახლოებით 40-დან 60-მდეა. სწორედ თავდაცვის ძალების აქტიური მოქმედებების წყალობით 2026 წლის პირველ ნახევარში რუსეთის ჯარების წინსვლის ტემპი ორჯერ მეტად შემცირდა“, - განაცხადა უკრაინის შეიარაღებული ძალების მთავარსარდალმა.
სირსკიმ აღნიშნა, რომ წინსვლის ტემპის მხრივ მხარეები ფაქტობრივად პარიტეტს მიუახლოვდნენ.
„ინარჩუნებს სტაბილურ ტენდენციას უკრაინის თავდაცვის ძალების მიერ გათავისუფლებული ტერიტორიების შეფარდების ზრდა იმ მონაკვეთებთან შედარებით, სადაც მტერი ახერხებს წინსვლას“, - განაცხადა სირსკიმ.
ასევე სირსკიმ განაცხადა, რომ ექვსი თვის განმავლობაში Deep Strike-ის (ღრმა დარტყმები) საშუალებებით რუსეთის ტერიტორიაზე 697 სამიზნე იქნა დაზიანებული. მისი თქმით, მოწინააღმდეგისთვის მიყენებული პირდაპირი და არაპირდაპირი ეკონომიკური ზარალი მინიმუმ 6,1 მილიარდ დოლარად ფასდება.
მისივე ინფორმაციით, ეფექტურად მუშაობს ასევე Middle Strike-ის (საშუალო სიღრმის დარტყმა) კამპანიით ამ პერიოდში მოწინააღმდეგის 7 028 ობიექტი იქნა დაზიანებული.
გარდა ამისა, სირსკის განცხადებით, არტილერიამ 456 ათასზე მეტი საცეცხლე ამოცანა შეასრულა. სარაკეტო ჯარებმა განახორციელეს 1 140-ზე მეტი დარტყმა, საჰაერო ძალების ავიაციამ - 1 100-ზე მეტი, ხოლო მხარდაჭერის ქვედანაყოფებმა - დაახლოებით 1 400 დარტყმა.
ნახევარი წლის შედეგების შემაჯამებელ თათბირზე სირსკიმ ასევე აღნიშნა პირადი შემადგენლობის როტაციის აუცილებლობა არანაკლებ 60 დღეში ერთხელ.
„ეს ჩვენი სამხედროების სიცოცხლისა და ჯანმრთელობის, მათი ბრძოლისუნარიანობისა და ადამიანების მიმართ სამართლიანი დამოკიდებულების საკითხია“, - განაცხადა უკრაინის შეიარაღებული ძალების მთავარსარდალმა.
