ევროკავშირი სომხეთის ერთ-ერთი ყველაზე საიმედო პარტნიორია და სომხეთსა და ევროკავშირს შორის ურთიერთობები დღეს უფრო მჭიდროა, ვიდრე ოდესმე.
ამის შესახებ სომხეთის პრემიერ-მინისტრმა ნიკოლ ფაშინიანმა ურსულა ფონ დერ ლაიენთან გამართულ ერთობლივ პრესკონფერენციაზე განაცხადა.
მისი თქმით, მოხარულია, რომ წელს უკვე მეორედ მასპინძლობს სომხეთში ევროკომისიის პრეზიდენტს.
„სომხეთსა და ევროკავშირს შორის თანამშრომლობის საფუძველს წარმოადგენს ყოვლისმომცველი და გაფართოებული პარტნიორობის შეთანხმება (CEPA) და სომხეთ-ევროკავშირის სტრატეგიული პარტნიორობის პროგრამა, რომლებიც ეფუძნება საერთო ღირებულებებს - დემოკრატიას, კანონის უზენაესობასა და ადამიანის უფლებების დაცვას,“ - განაცხადა ფაშინიანმა.
სომხეთის პრემიერ-მინისტრის თქმით, ორმხრივ შეხვედრაზე განიხილეს სომხეთის ეკონომიკის დივერსიფიკაციის საკითხები და ის სხვადასხვა მექანიზმები, რომელთა მეშვეობითაც ევროკავშირი ამ მიმართულებით მხარდაჭერას გაუწევს ქვეყანას.
ფაშინიანმა მადლობა გადაუხადა ევროკავშირს სომხეთისთვის გამოყოფილი 52 მილიონი ევროს ოდენობის საბიუჯეტო მხარდაჭერისთვის, ასევე სომხური პროდუქციის მიმართ ევროკავშირის წევრ ქვეყნებში ავტონომიური სავაჭრო შეღავათების ამოქმედების შესახებ ინიციატივის წარდგენისთვის.
„ამ გადაწყვეტილების ძალაში შესვლის შემდეგ, სომხეთი გახდება პირველი ქვეყანა, რომელსაც არ აქვს ევროკავშირის წევრობის კანდიდატის სტატუსი ან ევროკავშირთან თავისუფალი ვაჭრობის შეთანხმება, მაგრამ ევროკავშირი მის მიმართ ამ სავაჭრო ინსტრუმენტს გამოიყენებს,“ აღნიშნა სომხეთის პრემიერ-მინისტრმა.
მისი თქმით, სომხური მხარე იმედოვნებს, რომ ევროკავშირთან და მის წევრ სახელმწიფოებთან აქტიური თანამშრომლობის შედეგად გადაწყვეტილების მიღების პროცესი რაც შეიძლება მალე დასრულდება.
