როდესაც ექიმი გამოდის და ამბობს, რომ ადამიანი განიცდის საშინელ ტკივილებს და ამ დროს ბრიფინგებით ესაუბრები პენიტენციურ სამსახურს, მე ვფიქრობ, რომ ეს უბრალოდ, ყველაფერს მოკლებულია, - ამის შესახებ სპეციალური პენიტენციური სამსახურის გენერალური დირექტორი, გიორგი პატარიძე „კოალიცია ცვლილების“ ლიდერ ელენე ხოშტარიას ჯანმრთელობის დაკავშირებით ჟურნალისტებთან საუბრისას განაცხადა.
მისი თქმით, ელენე ხოშტარიას ჯანმრთელობის რეალური მდგომარეობის შეფასების ნაცვლად ბრიფინგებით საუბარი „აბსურდის თეატრია“.
"ექიმი გამოვიდა პენიტენციური დაწესებულებიდან და ვციტირებ მის სიტყვებს, რომ ამ შემთხვევაში, მსჯავრდებული ელენე ხოშტარიას და ამ შემთხვევაში, პაციენტი ელენე ხოშტარიასი, ჯანმრთელობის მდგომარეობა იმდენად მძიმეაო, რომ პრაქტიკულად, წარმოუდგენელია მისი გასინჯვაო. რა თქმა უნდა, მივიღე გადაწყვეტილება მყისიერად და დავავალე შესაბამისი დეპარტამენტის ხელმძღვანელს, სამედიცინო დეპარტამენტის ხელმძღვანელს, რომ მომხდარიყო კომუნიკაცია ქალბატონ მაკა იოსელიანთან. მას ჩვენ შევთავაზეთ შეხვედრა გუშინ დღის ნებისმიერ პერიოდში, თუმცა სამწუხაროდ და ჩემდა გასაოცრად, პასუხი მივიღე, რომ მას, უბრალოდ, არ ეცალა. როდესაც ექიმი გამოდის და ამბობს, რომ ადამიანი განიცდის საშინელ ტკივილებს და ამ დროს ბრიფინგებით ესაუბრები პენიტენციურ სამსახურს, მე ვფიქრობ, რომ ეს უბრალოდ, ყველაფერს მოკლებულია. მზად ვარ, ნებისმიერ დროს შევხვდე მას. ამიტომ მინდა, ექიმს შევხვდე, გავცვალოთ პოზიციები. ჩვენც გვაქვს საკმაოდ საინტერესო ანალიზი როგორც ლაბორატორიული ანალიზის პასუხები, ასევე სხვდასხვა დეტალები. ეს გვინდა ექიმთან გავიაროთ. მინიშნებით გეტყვით, რომ მე რატომღაც, თუნდაც 2026 წლის, დაახლოებით ალბათ თებერვლის თვე იყო, რომ საერთოდ სხვა პოზიცია მახსოვს მე მსჯავრდებული ელენე ხოშტარიასგან. ამას თავად მიხვდება. თუ ისევ ბრიფინგებით ვისაუბრებთ და არ გადავალთ კონკრეტულ საქმეზე და კონკრეტული პროცესების მართვაზე, მაშინ მე იძულებული ვიქნები, სხვა ნაბიჯები გადავდგა", - განაცხადა პატარიძემ.
