გარემოს დაცვისა და სოფლის მეურნეობის მინისტრი დავით სონღულაშვილი იმერეთის რეგიონში იმყოფებოდა, სადაც სახელმწიფოს მხარდაჭერით შექმნილი საწარმოებისა და მეურნეობების საქმიანობას გაეცნო.
„ძალიან მნიშვნელოვანია რეგიონებში ვიზიტი და როგორც პირველადი ისე გადამმუშავებელი საწარმოების საქმიანობის ადგილზე გაცნობა. განსაკუთრებით აღსანიშნავია აკვაკულტურის მიმართულება, რომელიც სოფლის მეურნეობის ერთ-ერთი პრიორიტეტული დარგია. მნიშვნელოვანია, რომ დარგის განვითარება სწრაფი ტემპით გაგრძელდეს.
სახელმწიფოს მხარდაჭერით რეგიონში მოქმედი გადამმუშავებელი საწარმოები იძლევა შესაძლებლობას, პროდუქცია ადგილზე შეიქმნას, ეს კი, თავის მხრივ, ხელს უწყობს როგორც რეგიონის, ისე ქვეყნის ეკონომიკის განვითარებას. სამინისტროს მხრიდან მოქმედებს სხვადასხვა პროგრამა, რომლის მეშვეობითაც წარმოების მხარდაჭერას და ახალი საწარმოების შექმნის ხელშეწყობას ვაგრძელებთ, რათა რეგიონები კიდევ უფრო მეტად გაძლიერდეს“, - აღნიშნა დავით სონღულაშვილმა.
მინისტრმა ყურადღება გაამახვილა სამინისტროს რეგიონული უწყებების განახლებულ ინფრასტრუქტურაზე და აღნიშნა, რომ თანამშრომლებისთვის ღირსეული სამუშაო პირობების შექმნა სამინისტროს ერთ-ერთი პრიორიტეტია.
„დღეს გავხსენით მინერალური რესურსების ეროვნული სააგენტოს ახალი რეგიონული ოფისი. თანამშრომლებისთვის კეთილმოწყობილი და თანამედროვე სამუშაო გარემოს შექმნა სამინისტროს ერთ-ერთი პრიორიტეტული მიმართულებაა, რათა მათ სრულფასოვნად შეძლონ საკუთარი უფლება-მოვალეობების შესრულება“,-განაცხადა დავით სონღულაშვილმა.
იმერეთის რეგიონში ვიზიტის ფარგლებში, დავით სონღულაშვილი წყალტუბოს მუნიციპალიტეტის სოფელ მაღლაკში ლურჯი მოცვის ბაღში მოსავლის კრეფისა და სარეალიზაციოდ მომზადების პროცესს გაეცნო. მინისტრმა დაათვალიერა წყალტუბოში მდებარე სასათბურე მეურნეობა „ჰერბია“, ქუთაისში მცენარეული ნედლეულის გადამმუშავებელი საწარმო „ფარკონი“ და ნახევარფაბრიკატების მწარმოებელი კომპანია „კულინარი“, სოფელ გეგუთში აკვაკულტურის მეურნეობა და ბაღდათის მუნიციპალიტეტში ღვინის მარანი „ლაბარა“, ხოლო ქუთაისში მინერალური რესურსების ეროვნული სააგენტოს ახალი რეგიონული ოფისი გახსნა.
