გარემოს დაცვისა და სოფლის მეურნეობის მინისტრმა დავით სონღულაშვილმა იმერეთის რეგიონში ვიზიტის ფარგლებში, წყალტუბოს მუნიციპალიტეტში მოქმედი შპს „ჰერბიას“ მეურნეობა დაათვალიერა.
დავით სონღულაშვილის განცხადებით, სახელმწიფოს მხრიდან აგროწარმოების განვითარების პოლიტიკის ერთ-ერთი მნიშვნელოვანი მიმართულება სასათბურე მეურნეობების შექმნის ხელშეწყობაა. დახურულ გრუნტში სასოფლო-სამეურნეო პროდუქციის წარმოების ზრდა უზრუნველყოფს როგორც ადგილობრივი, ასევე საექსპორტო ბაზრების არა სეზონურად, არამედ უწყვეტად მომარაგებას. შესაბამისად, არაერთი პროგრამა მუშაობს აღნიშნული მიმართულების განვითარებისთვის.
შპს „ჰერბია“ სასათბურე მეურნეობას ფლობს და ადგილობრივ ბაზარს სხვადასხვა სახეობის მწვანილითა და ბოსტნეულით ამარაგებს. საწარმო პროდუქციას ქსელურ მარკეტებს აწვდის.
შპს „ჰერბია“ 2014 წლიდან სოფლის განვითარების სააგენტოს ბენეფიციარია. კომპანიამ „საპილოტე რეგიონების ინტეგრირებული განვითარების პროგრამითა“ და პროექტით „შეღავათიანი აგროკრედიტი“ ისარგებლა.
იმერეთის რეგიონში, „შეღავათიანი აგროკრედიტის“ პროექტის ფარგლებში, სასათბურე მეურნეობების მოწყობისა და განვითარების მიზნობრიობით ბანკების მიერ გაცემულია 50,7 მლნ ლარზე მეტი აგროსესხი, სოფლის განვითარების სააგენტოს თანადაფინანსება 10,9 მლნ ლარია.
მინისტრთან ერთად, მინისტრის მოადგილეები ლაშა ავალიანი და გიორგი წკრიალაშვილი, სოფლის განვითარების სააგენტოს დირექტორი ზურაბ გოზალიშვილი, სურსათის ეროვნული სააგენტოს უფროსი გიორგი იაკობაშვილი და ადგილობრივი ხელისუფლების წარმომადგენლები იმყოფებოდნენ.
