მიხეილ სააკაშვილი ისე ლაპარაკობს, თითქოს ნიკა გილაური მისი პრემიერი არ ყოფილიყო, თითქოს „ნაციონალურ მოძრაობას“ გილაურთან მოლაპარაკება არ ჰქონოდა, რომ წინასაარჩევნოდ მათი დამფინანსებელი ყოფილიყო, – ამის შესახებ „ოპოზიციის ალიანსის“ ერთ-ერთმა ლიდერმა ნიკა გვარამიამ განაცხადა.
როგორც გვარამიამ აღნიშნა, „ნაციონალურმა მოძრაობამ“ უნდა მიხედოს იმას, რაც შიგნით ხდება.
„ჩემი დამოკიდებულებები ჩემი დამოკიდებულებებია. მას შეუძლია, თავისი დამოკიდებულება ჰქონდეს. გულწრფელად ვიტყვი – მომბეზრდა გილაურებზე რაღაცების მოსმენა. მიხეილ სააკაშვილი ისე ლაპარაკობს, თითქოს გილაური მისი პრემიერი არ ყოფილიყო, თითქოს „ნაციონალურ მოძრაობას“ გილაურთან მოლაპარაკება არ ჰქონოდა, რომ წინასაარჩევნოდ მათი დამფინანსებელი ყოფილიყო. უკვე შეუძლებელია ამის მოსმენა. გუშინ ეს იმიტომ დავწერე, რომ აქამდე თავდასხმებს ვპასუხობდი. ახლა თავდასხმებსაც აღარ ვუპასუხებ. მომბეზრდა. თვითონ მიხედოს „ნაციონალურ მოძრაობას“ და იმას, რაც შიგნით ხდებაა“, – განაცხადა გვარამიამ.
