საქართველოს პარლამენტის თავმჯდომარის შალვა პაპუაშვილის განცხადებით, იმედი აქვს, ევროკავშირში შეწყდება იმ იდეის განხილვა, რომელიც გულისხმობს ევროკავშირის შიგნით ერების სეგრეგაციას.
პაპუაშვილმა კომენტარი გააკეთა გაფართოების საკითხებში ევროკომისრის, მარტა კოსის განცხადებასთან დაკავშირებით, რომელმაც თქვა, რომ ევროკავშირის ახალი წევრებისთვის ვეტოს უფლება შეიზღუდება.
პაპუაშვილმა აღნიშნა, რომ კანდიდატმა ქვეყნებმა ხმა უნდა აიმაღლონ ამ აღმაშფოთებელი ინიციატივის წინააღმდეგ.
„იმედი მაქვს, განხილვები შეწყდება და მეორე მხრივ, ვფიქრობ, ახლა დადგა მომენტი, როცა კანდიდატმა ქვეყნებმა ხმა უნდა აიმაღლონ ამ მართლაც აღმაშფოთებელი ინიციატივის წინააღმდეგ, რომელიც გულისხმობს 21-ე საუკუნეში ერების სეგრეგაციას ევროკავშირის შიგნით. ოთხი წლის წინ როცა ვაკეთებდით განაცხადს ევროკავშირის წევრობაზე, ჩვენ ხელი არ მოგვიწერია ამაზე, რომ საქართველოს გაწევრიანების შემდეგ არ ექნება ხმა და რეალური თანამონაწილეობა საგარეო პოლიტიკაში, ჩვენს ნაცვლად გადაწყვეტენ, ჩვენ გარეშე გადაწყვეტენ უსაფრთხოების პოლიტიკას, ევროკავშირის საფინანსო საბიუჯეტო პოლიტიკას ჩვენ გარეშე გადაწყვეტენ, უფლებების საკითხებს და ახალი უფლებების საკითხებს ჩვენ გარეშე გადაწყვეტენ. რაც მთავარია, ევროკავშირის ხელშეკრულებების შეცვლას გადაწყვეტენ ჩვენ გარეშე, რასაც უნდათ, იმას ჩაწერენ და ამოიღებენ ისე, რომ ახალ წევრებს არც კი ჰკითხავენ. არ ვიცი, სხვა რა არის საბჭოთა კავშირი, თუ არა ასეთი მიდგომა, რომ არსებობენ დიდი ერები და მცირე ერები და დიდი ერები დომინანტობენ მცირე ერებზე. სამწუხარო განვითარებაა ძალიან. ფროიდისეული წამოცდენა გეგონებოდა ადამიანს, რომ არ აკვირდებოდე, ნაბიჯ-ნაბიჯ, ნელ-ნელა გვაგუებდნენ და გვაგუებენ ახლაც ამ აზრს, რომ ევროკავშირის წევრობის შემთხვევაში, ჩვენ ვიქნებით მეორეხარისხოვანი ერი ევროკავშირში“, – განაცხადა შალვა პაპუაშვილმა.
