მარცხით გაწბილებული რუსეთი გადასულია ახალ ამოცანაზე, თავის ლოიალურ „ქართული ოცნების“ რეჟიმთან ერთად, რაც არის ის, რომ საქართველოს ევროპული ინტეგრაციის პროცესი არამარტო რეალურად შეჩერდეს, სრულად იქნეს გაუქმებული, - ამის შესახებ „ლელო- ძლიერი საქართველოს“ ერთ-ერთმა ლიდერმა გრიგოლ გეგელიამ განაცხადა.
გეგელია გამოეხმაურა პარლამენტის თავმჯდომარის, შალვა პაპუაშვილის განცხადებას, რომელშიც ის აღნიშნავს, რომ „ბრიუსელის იდეა, მოახდინოს ქვეყნების უფლებრივი სეგრეგაცია, რადიკალურად ცვლის ევროკავშირის ფუძემდებლურ პრინციპს და მას, თანაბარ ერთა კავშირიდან, „პირველხარისხოვან“ და „მეორეხარისხოვან“ ერთა კავშირად აქცევს“.
გეგლიას თქმით, მზადდება საფუძველი იმისთვის, რომ ფორმალურად აღარ არსებობდეს საქართველოს ევროპული ინტეგრაციის პროექტი.
„როგორც ჩანს, მარცხით გაწბილებული რუსეთი ახლა არის გადასული ახალ ამოცანაზე, თავის ლოიალურ რეჟიმთან, „ქართული ოცნების“ რეჟიმთან ერთად, რაც არის ის, რომ საქართველოს ევროპული ინტეგრაციის პროცესი არამარტო რეალურად შეჩერდეს, სრულად იქნეს გაუქმებული. ახლა, როგორც ჩანს, მზადდება საფუძველი იმისთვის, რომ ფორმალურად აღარ არსებობდეს საქართველოს ევროპული ინტეგრაციის პროექტი, გზა და კურსი“,- განაცხადა გეგელიამ.
