მე თუთიყუშზე ვნერვიულობ, თუთიყუში როგორ არის? ეგ ინფორმაცია მაინტერესებს, რა მდგომარეობაშია თუთიყუში მას შემდეგ, რაც ბუმბული დაკარგა - ასე უპასუხა დედაქალაქის მერმა, კახა კალაძემ ჟურნალისტის მიერ დასმულ შეკითხვას აქციების დროს დაშავებული მოქალაქეების შესახებ.
ჟურნალისტმა კალაძეს უთხრა, რომ ის მოქალაქეები, რომლებიც აქციების დაშლის დროს დაშავდნენ, პროკურატურას დაზარალებულად არ უცნია. მედიის წარმომადგენელმა თბილისის მერს ასევე გაახსენა BBC-ს დოკუმენტური ფილმი, რომელშიც ნოემბერ-დეკემბერში, აქციების დაშლის დროს ქიმიური ნივთიერების შესაძლო გამოყენებაზე იყო საუბარი.
"მე თუთიყუშზე ვნერვიულობ როგორ არის. ეგ ინფორმაცია მაინტერესებს, როგორ არის თუთიყუში მას შედეგ, რაც ბუმბული დაკარგა - არ გვაქვს ინფორმაცია? - განაცხადა კალაძემ კითხვის პასუხად.
ცნობისთვის დღეს საიამ განაცხადა, რომ წყლის ჭავლში ქიმიური ნივთიერებების შერევა "ექსპერიმენტული იარაღია" და პროკურატურისგან სამართლებრივ შეფასება მოითხოვა.
საქართველოს ახალგაზრდა იურისტთა ასოციაცია მიიჩნევს, რომ ამგვარმა მოქმედებამ შეიძლება სისხლისსამართლებრივად დასჯადი არასათანადო მოპყრობის კვალიფიკაციასაც მიაღწიოს.
