რუსეთი დამარცხდა რუმინეთში, მოლდოვაში, უნგრეთში და ახლა უკვე სომხეთშიც! რუსეთი მარცხდება მთელ რეგიონში და მალე დამარცხდება საქართველოშიც “ქართული ოცნების” სამარცხვინო რეჟიმის განდევნით! - ამის შესახებ ოალიცია „ძლიერი საქართველო - ლელოს“ ერთ-ერთმა ლიდერმა, გრიგოლ გეგელიამ განაცხადა.
"მინდა მივულოცო ბატონ ნიკოლ ფაშინიანს და სრულიად სომეხ ერს ეროვნული ინტერესის დამაჯერებელი გამარჯვება!
რუსეთი დამარცხდა რუმინეთში, მოლდოვაში, უნგრეთში და ახლა უკვე სომხეთშიც! რუსეთი მარცხდება მთელ რეგიონში და მალე დამარცხდება საქართველოშიც “ქართული ოცნების” სამარცხვინო რეჟიმის განდევნით!
გუშინ გაიმარჯვა არამარტო დემოკრატიულმა სომხეთმა, არამედ დემოკრატიულმა საქართველომაც, რადგან ამ ორს ერთმანეთი სჭირდება სასიცოცხლოდ.
სომხეთი, რუმინეთი, მოლდოვა, უნგრეთი - ყველა ეს მაგალითი აჩვენებს, რომ ხალხის დამთრგუნველ უპირატესობას ვერ მოერევა ვერაფერი, ეროვნული ინტერესის სასიკეთოდ დარაზმულ ხალხის ძალას ვერ დაუპირისპირდება ვერცერთი ძლიერი სახელმწიფო, ვერცერთი გაყალბების სისტემა, მას ვერ დაძლევს ვერც პროპაგანდის და სიცრუის სისტემები და ვერც უიმედობა.
ყოველთვის იმარჯვებს ერი, რომელიც მტკიცედ იცავს საკუთარ ეროვნულ ინტერესს. სომხეთის გამოცდილება ნათლად აჩვენებს, რომ პრაგმატული საგარეო პოლიტიკა, დემოკრატიული ინსტიტუტების გაძლიერება, მშვიდობისკენ მიმართული ძალისხმევა და ეროვნული ინტერესების დაცვა არჩევნების გზით, იძლევა რეალურ შედეგებს.
გვახარებს რა სომხეთის გამარჯვება, დღეს წუხილით ვიხსენებთ, რომ ანტიქართული "ოცნების" მმართველობის პირობებში საქართველომ დაკარგა ყველა რეგიონული უპირატესობა, რაც მას ისტორიულად ჰქონდა. ერევანი გახდა რეგიონის პოლიტიკური ცენტრი, ხოლო თბილისი მაჩანჩალა პერიფერია. სომხეთმა უმასპინძლა აშშ-ის ვიცე-პრეზიდენტს, აშშ-ის სახელმწიფო მდივანს, ევროკავშირის ყველა ლიდერს, ხოლო თბილისი მასპინძლობს გავრილოვს და პოზნერს. სომხებმა აჩვენეს უპირატესობა დემოკრატიის სტანდარტით, პრაგმატული საგარეო პოლიტიკით, საგარეო ინვესტიციების მოზიდვით, მრავალმილიარდიანი ეკონომიკური და პოლიტიკური პაკეტების მიღებით.
ქვეყანა, რომელშიც ერთ დროს გამოცხადდა თავისუფალი სომხეთი და აზერბაიჯანი, რომელიც იყო ასოცირებული ტრიოს შემოქმედი და სამხრეთ კავკასიის პოლიტიკური ცენტრი, ამ რეჟიმმა გადააქცია მაჩანჩალად, როგორც ასოცირებულ ტრიოში, ასევე სამხრეთ კავკასიაშიც. ჩვენ ძალიან მკაფიოდ ვხედავთ, რომ სომხეთს შეჰყავს მაღალი ხარისხის ინვესტორები, მათ შორის "ენვიდია", სომხეთი ქმნის ათობით ათასს სამუშაო ადგილს მაშინ, როდესაც ამ რეჟიმის დე ფაქტო პრემიერი ანადგურებს და კლავს ანაკლიას და სამაგიეროდ გადაქცეულია არაბული ბინების მაკლერად.ეს არის ყველა დროის ყველაზე დაბალი და სამარცხვინო მომენტი საქართველოს ისტორიაში.
ამასობაში, თბილისიდან რამდენიმე საათის გზაზე, მართლაც ამოქმედდა პრაგმატული საგარეო პოლიტიკის, მშვიდობის და კეთილდღეობის მოდელი ფაშინიანის მეთაურობით.
სწორედ ამიტომ, ამაყი ქართველი ხალხი უნდა დაირაზმოს და შეუერთდეს უნგრელებს, სომხებს, მოლდოველებს და რუმინელებს ამ დიდ ბრძოლაში ეროვნული ინტერესისა და კაცობრიობის პროგრესული მონაპოვრის დასაცავად!" - განაცხადა გრიგოლ გეგელიამ
