26 მაისს ვგეგმავთ პროტესტის გადაყვანას ახალ საფეხურზე. ეს მოიცავს კვლავ ბევრი ადამიანის მეშვეობით რეჟიმის გაპროტესტებას, – ამის შესახებ „ოპოზიციის ალიანსის“ ერთ-ერთმა ლიდერმა, ნიკა გვარამიამ განაცხადა.
მისივე თქმით, „მოუწოდებს ხელისუფლებას, თავი შეიკავოს ნებისმიერი ინციდენტისგან“.
„ხვალ 26 მაისია, ძალიან მნიშვნელოვანი დღე საქართველოს ისტორიაში. ვფიქრობთ, ამ დღეს ყველას განსაკუთრებული მოტივაცია გვაქვს, შევიკრიბოთ და გამოვხატოთ დამოკიდებულება ქვეყანაში მიმდინარე მოვლენებისადმი. აქცია, უკვე ორი თვეა, დაანონსებულია და მასზე მუშაობს ოპოზიციური ალიანსი. ორი დღის წინ თბილისის მერიამ გვიპასუხა, რომ რუსთაველი გადაკეტილი იქნება და იქ, რეალურად, აქციის გამართვა მიზანშეწონილად არ მიაჩნიათ, ასევე უარი გვითხრა ტექნიკის გადაადგილებაზე, ეკრანისა და გახმოვანების აპარატურაზე. იგივე პასუხი მოვიდა შსს-დან. გუშინ გავრცელდა ინფორმაცია, რომ რუსთაველი ცარიელი იქნება ჭანტურიას შემდეგ, იქ არაფერი იქნება. ჩვენ ვითხოვთ სწორედ ამ ტერიტორიას, რომელიც თავად შსს-მ განაცხადა, რომ გადაკეტილი და ცარიელი იქნება. ეს ტერიტორია ეკუთვნის მოქალაქეებს, პროტესტის გამოხატვის ადგილია თბილისში. ისტორიულად ზუსტად რუსთაველის გამზირია საპროტესტო ადგილი. 26 მაისს ვგეგმავთ ძალიან ბევრი ადამიანით პროტესტის გადაყვანას უკვე ახალ საფეხურზე. ეს მოიცავს კვლავ ბევრი ადამიანის მეშვეობით რეჟიმის გაპროტესტებას. ჩვენი დამოკიდებულება არის მკაფიო, არ ვცვლით დაგეგმილ მარშრუტს, რომელიც ხელისუფლებისთვის და საზოგადოებისთვის, ორი თვეა, ცნობილია. იმის გამო, რომ ვიღაცამ გადაწყვიტა, თავისი შიშის თუ მისთვის ცნობილი მიზანშეწონილობის გამო შეგვაცვლევინოს გეგმები ჩვენ და საქართველოს მოქალაქეებს, ეს გეგმები არ შეიცვლება. ჩვენი მოთხოვნა ემყარება კონსტიტუციას, მოვახდენთ ჩვენი უფლების სრულად რეალიზაციას. რაც შეეხება ივანიშვილის რეჟიმის ანტიკონსტიტუციურ გადაწყვეტილებებს და ანტიკონსტიტუციურ შეზღუდვებს, არ ვაპირებთ, მორჩილება გამოვუცხადოთ იმას, რაც კანონის მოთხოვნებს და საქართველოს ეროვნულ ინტერესებს ეწინააღმდეგება. ხვალ, 19:00 საათზე ვიკრიბებით უნივერსიტეტის პირველ კორპუსთან, შემდეგ მივდივართ მარშით რუსთაველზე. მანამდე ბოლომდე ვეცდებით, შევიტანოთ ტექნიკა, დავამონტაჟოთ სცენა, ეკრანები, სრულფასოვანი აქცია გავმართოთ, რისი უფლებაც გვაქვს. მოვუწოდებ ხელისუფლებას, თავი შეიკავოს ნებისმიერი ინციდენტისგან. აქ იმყოფება, მათ შორის, ამერიკის შეერთებული შტატების მაღალი რანგის დელეგაცია, მასთან შეხვედრები აქვს ოპოზიციას, ასევე თვითგამოცხადებულ ხელისუფლებას და პროცესები გამადიდებელი შუშის ქვეშ არის საქართველოს შიგნით და გარეთ. ყველამ თავი შეიკავოს უკანონო ქმედებისგან, ყველა უკანონობაზე არსებობს პასუხი. ყველამ თავი შეიკავოს ნებისმიერი ტიპის ესკალაციისგან. ჩვენი პროტესტი არის მშვიდობიანი და კონსტიტუციურ უფლებებს ემყარება“, – განაცხადა ნიკა გვარამიამ.
