უკრაინა „არ ურჩევს“ რუსეთისადმი მეგობრულად განწყობილი სახელმწიფოების წარმომადგენლებს, ამ დღეებში მოსკოვში ჩავიდნენ, - ამის შესახებ უკრაინის პრეზიდენტმა ვოლოდიმირ ზელენსკიმ ვიდეომიმართვაში განაცხადა.
მან კიდევ ერთხელ აღნიშნა, რომ უკრაინა დიდი ხანია და არაერთხელ სთავაზობს რუსეთს ცეცხლის შეწყვეტას.
„ამჯერად - 6 მაისიდან. უკრაინა მზად იყო სრული სიჩუმის უზრუნველსაყოფად, თუმცა ჩვენი სამშვიდობო შეთავაზების პასუხად მივიღეთ მხოლოდ ახალი რუსული დარტყმები და ახალი მუქარები რუსეთის მხრიდან“,- განაცხადა ზელენსკიმ.
ზელენსკის თქმით, რუსეთს უკრაინისგან სურს „ნებართვა“ საკუთარი აღლუმის ჩასატარებლად, რათა წელიწადში ერთხელ ერთი საათით უსაფრთხოდ გამოვიდნენ მოედანზე, შემდეგ კი „კვლავ გააგრძელონ ადამიანების მკვლელობა და ომი“.
„რუსები უკვე თავად საუბრობენ 9 მაისის შემდეგ შესაძლო დარტყმებზე. ეს რუსეთის ხელმძღვანელობის უცნაური და სრულიად არაადეკვატური ლოგიკაა. ჩვენ ასევე მივიღეთ მიმართვები ზოგიერთი რუსეთთან დაახლოებული სახელმწიფოებისგან, რომელთა წარმომადგენლებიც მოსკოვში ჩასვლას გეგმავენ. უცნაური სურვილია… ამ დღეებში. ჩვენ ამას არ ვურჩევთ“, - განაცხადა ზელენსკიმ.
