რუსეთის პრეზიდენტის უსაფრთხოებაზე პასუხისმგებელმა ფედერალური დაცვის სამსახურმა (FSO) მნიშვნელოვნად გააძლიერა ვლადიმირ პუტინის დაცვის ზომები, რადგან მას თავდასხმის და გადატრიალების ეშინია. ამ დასკვნამდე მივიდნენ ევროპული ქვეყნების სადაზვერვო სამსახურები, რომელთა ანგარიშებსაც "ვაჟნიე ისტორიის", ასევე CNN-ისა და Financial Times-ის ჟურნალისტებმა გადახედეს.
გავრცელებული ინფორმაციით, დაცვის გაძლიერებული ზომის ფარგლებში, პუტინი დიდ დროს ატარებს კრასნოდარის მხარეში არსებულ რეზიდენციაში, სადაც მოდერნიზებული ბუნკერების სისტემაა მოწყობილი.
რუსული მედია კვლავ იყეებს წინასწარ მომზადებულ ვიდეოჩანაწერებს პუტინის საქმიანობის შესახებ რეპორტაჟებისთვის.
მნიშვნელოვნად შემცირდა იმ ადგილების სია, რომელსაც პუტინი სტუმრობდა. არც ის და არც მისი ოჯახის წევრები არ სტუმრობენ რეზიდენციეს მოსკოვის მხარეში ან ვალდაიში.
2026 წელს პუტინს ერთხელაც არ მოუნახულებია სამხედრო ობიექტები, თუმცა გასულ წელს ასეთი ვიზიტები რეგულარული იყო.
გარდა ამისა, დაწესდა სხვა უსაფრთხოების ზომები, რომლებიც ვრცელდება პუტინისთვის მომუშავე პერსონალზე:
მისი უახლოესი თანამოაზრეების სახლეში დამონტაჟებულია სათვალთვალო სისტემები.
პრეზიდენტთან მომუშავე შეფ-მზარეულებს, მცველებსა და ფოტოგრაფებს ეკრძალებათ საზოგადოებრივი ტრანსპორტით სარგებლობა და ისინი პრეზიდენტის ადმინისტრაციაში ორდონიან უსაფრთხოების შემოწმებას გადიან, მათ შორის ჩხრეკას.
თანამშრომლებს, რომლებიც პუტინთან უწევთ ხშირი ურთიერთობა, უფლება აქვთ გამოიყენონ მხოლოდ ინტერნეტთან წვდომის გარეშე ტელეფონები.
იუწყებიან, რომ ფედერალური დაცვის სამსახური, პრეზიდენტის საიდუმლო ბრძანებულებაზე დაყრდნობით, აკონტროლებს და ამტკიცებს პუტინთან დაკავშირებულ ნებისმიერ სიახლეს ან მედია პუბლიკაციას.
ზოგიერთი ზომა რუსეთის შეიარაღებული ძალების გენერალური შტაბის ოპერატიული მომზადების დირექტორატის უფროსის, გენერალ-ლეიტენანტი ფანილ სარვაროვის მკვლელობის შემდეგ იქნა მიღებული.
დაზვერვის ანგარიშში აღწერილია ვლადიმირ პუტინის 25 დეკემბერს, სარვაროვის მკვლელობიდან სამი დღის შემდეგ, უსაფრთხოების წარმომადგენლების შეხვედრა. ამ შეხვედრაზე, როგორც „ვაჟნიე ისტორიი“ იტყობინება, უსაფრთხოების უწყებების წარმომადგენლებმა „ერთმანეთზე გადაიტანეს პასუხისმგებლობა უსაფრთხოების სისტემის ნაკლოვანებებზე“.
ევროპული დაზვერვის მონაცემებით, მარტის დასაწყისიდან პუტინი შეშფოთებულია მგრძნობიარე ინფორმაციის გაჟონვით და შეთქმულების ან გადატრიალების მცდელობის რისკით. კერძოდ, ის შიშობს, რომ რუსეთის პოლიტიკური ელიტის წევრების მიერ შესაძლოა დრონები იქნეს გამოყენებული მკვლელობის მცდელობისას. ყოფილი თავდაცვის მინისტრი სერგეი შოიგუ, რომელიც 2024 წლის მაისიდან უშიშროების საბჭოს მდივნის თანამდებობას იკავებს და სავარაუდოდ, „მნიშვნელოვან გავლენას ინარჩუნებს უმაღლეს სამხედრო სარდლობაში“, „პოტენციურ დესტაბილიზაციის ფაქტორად“ ითვლება.
2026 წლის მარტის დასაწყისში, შოიგუს ყოფილი პირველი მოადგილე, რუსლან ცალიკოვი, მოსკოვში დააკავეს კრიმინალური ორგანიზაციის შექმნის, ფულის გათეთრების, მითვისებისა და მექრთამეობის ბრალდებით. ევროპული დაზვერვის ანგარიშში ნათქვამია, რომ ეს დაკავება ასუსტებს შოიგუს პოზიციას და ზრდის იმის ალბათობას, რომ თავად შეიძლება გახდეს სისხლისსამართლებრივი დევნის სამიზნე.
