აშშ-ის პრეზიდენტის, დონალდ ტრამპის სპეციალური წარმომადგენლები სტივ უიტკოფი და ჯარედ კუშნერი კიევში ვიზიტს არ ჩქარობენ, რადგან ვაშინგტონში მიიჩნევენ, რომ სამშვიდობო მოლაპარაკებების განახლება ამ ეტაპზე შედეგს ვერ მოიტანს.
ამის შესახებ Kyiv Independent ანონიმურ წყაროებზე დაყრდნობით წერს.
გამოცემის ცნობით, ერთ-ერთმა მაღალი რანგის უკრაინელმა ოფიციალურმა პირმა აღნიშნა, რომ წარმომადგენლებმა კიევში ვიზიტის შესახებ პირობა არაერთხელ დადეს, თუმცა ეს დაპირება ჯერ არ შეუსრულებიათ.
წყაროს თქმით, კიევში უკმაყოფილებას იწვევს დიპლომატიური კონტაქტების დისბალანსი, რადგან უიტკოფი და კუშნერი ხშირად სტუმრობდნენ რუსეთს ვლადიმირ პუტინთან შეხვედრებისთვის.
გამოცემის ინფორმაციით, დაგეგმილი ვიზიტი მიზნად ისახავდა არა მხოლოდ კეთილი ნების დემონსტრირებას, არამედ უნდა გამხდარიყო ბიძგი უკრაინას, რუსეთსა და აშშ-ს შორის სამმხრივი დიპლომატიის განახლებისთვის.
ორი წყაროს ინფორმაციით, იგეგმებოდა, რომ სტივ უიტკოფი და ჯარედ კუშნერი თავდაპირველად კიევს ეწვეოდნენ, შეხვდებოდნენ ვოლოდიმირ ზელენსკის და შემდეგ გაემგზავრებოდნენ მოსკოვში ვლადიმირ პუტინთან მოლაპარაკებებისთვის.
როგორც იუწყებიან, ამ ეტაპზე ვიზიტს რამდენიმე ფაქტორი ართულებს.
წყაროების თქმით, სტრატეგიულ დონეზე ორივე წარმომადგენელი აქტიურად არის ჩართული აშშ-სა და ირანს შორის მიმდინარე მოლაპარაკებებში, რაც ვაშინგტონის საგარეო პოლიტიკის დღის წესრიგში დომინირებს. ერთ-ერთი ოფიციალური პირის შეფასებით, ფოკუსი იმდენად არის შეცვლილი, რომ უკრაინა უკვე აღარ განსაზღვრავს დიპლომატიურ პრიორიტეტებს.
გარდა ამისა, პრობლემას წარმოადგენს ომის პირობებში გადაადგილებაც. ერთ-ერთი წყაროს თქმით, წარმომადგენლებისთვის, მათ შორის უიტკოფისთვის, სარკინიგზო მგზავრობა რთულია.
ამასთან, უფრო სერიოზულ გამოწვევად სახელდება მოლაპარაკებებში პროგრესის არარსებობა და რისკი, რომ ვიზიტი ამ ჩიხს კიდევ უფრო გამოავლენს. როგორც ერთ-ერთმა უკრაინელმა ოფიციალურმა პირმა აღნიშნა, რუსეთი დონბასზე სრულ კონტროლს ითხოვს, მაშინ როცა კიევი კომპრომისული გადაწყვეტის მოძებნაზე საუბრობს.
„ამ ეტაპზე აზრი არ აქვს“, - განაცხადა იმავე წყარომ.
ამერიკელმა ოფიციალურმა პირმა გამოცემას განუცხადა, რომ ვიზიტი კვლავ განიხილება, თუმცა ჯერ არ არის დადასტურებული.
მიუხედავად მაღალი დონის კონტაქტების შეჩერებისა, კიევსა და ვაშინგტონს შორის კომუნიკაცია გრძელდება. მხარეები კოორდინაციას სხვადასხვა არხით აგრძელებენ, პარალელურად კი უკრაინა თანამშრომლობის „ახალი ფორმატების“ მოძებნას ცდილობს.
ერთ-ერთი წყაროს თქმით, ამ ეტაპზე აშშ-ში ვითარება უკრაინისთვის ნაკლებად ხელსაყრელია, რაც ირანთან დაკავშირებულ პროცესებს უკავშირდება.
