Bloomberg-ის ცნობით, უნგრეთის მომავალ პრემიერ-მინისტრს, პეტერ მადიარს სურს, რომ უკრაინაში მცხოვრებ უნგრულ უმცირესობას მეტი უფლებები მიენიჭოს, ვიდრე ქვეყანა მხარს დაუჭერს კიევის ევროკავშირში გაწევრიანების შესახებ ოფიციალური მოლაპარაკებების დაწყებას.
გამოცემის ინფორმაციით, ეს საკითხი მადიარისა და ევროკავშირის საბჭოს პრეზიდენტის ანტონიო კოშტას შეხვედრისას განიხილეს, რომელიც ოთხშაბათს ბრიუსელში გაიმართა.
წყაროები, რომლებმაც ანონიმურობის პირობით ისაუბრეს, აცხადებენ, რომ ევროკავშირი მადიარზე ზეწოლას ახდენს, რათა მან უარი თქვას წინა მთავრობის პოზიციაზე, რომელიც ეწინააღმდეგებოდა უკრაინასთან გაწევრიანების შესახებ ოფიციალური მოლაპარაკებების დაწყებას.
აღნიშნულია, რომ მადიარმა წამოაყენა პირობები, რომლებიც ძირითადად იმეორებს მოთხოვნების ჩამონათვალს, რომელიც ყოფილმა პრემიერ-მინისტრმა ვიქტორ ორბანნა 2024 წელს კიევს წარუდგინა. მოთხოვნები ეხებოდა უკრაინაში მცხოვრები უნგრული უმცირესობის უფლებებსა და განათლების სისტემაში უნგრულენოვანი სწავლების ხელმისაწვდომობას.
წყაროების თანახმად, მიუხედავად იმისა, რომ მადიარმა ანტონიო კოშტასთან შეხვედრა „სასარგებლოდ და კონსტრუქციულად“ შეაფასა, შეხვედრის განწყობა ნაკლებად პოზიტიური იყო, ვიდრე იმავე დღეს გამართული შეხვედრისას ევროკომისიის პრეზიდენტ ურსულა ფონ დერ ლაიენთან.
გამოცემა აღნიშნავს, რომ მადიარის მკაცრი პოზიცია, სავარაუდოდ, იმედგაცრუებას გამოიწვევს კიევში და ბრიუსელში, სადაც იმედოვნებდნენ, რომ ორბანის წასვლა უკრაინის ევროკავშირში გაწევრიანების პროცესს დააჩქარებდა. ეს განსაკუთრებით ეხება მოლაპარაკებების ოფიციალურ დაწყებას პოლიტიკის რიგ მიმართულებებზე, სადაც უკრაინამ უკვე შეასრულა საჭირო კრიტერიუმები.
შეგახსენებთ, პეტერ მადიარი უკრაინის ზაკარპატიის ოლქში მდებარე ქალაქ ბერეგოვოს მერს შეხვდა და ადგილობრივი უნგრული უმცირესობის მდგომარეობა განიხილა. მან ასევე გამოთქვა სურვილი უკრაინის პრეზიდენტ ვოლოდიმირ ზელენსკისთან პირველი ოფიციალური შეხვედრა ბერეგოვოში გამართოს.
