ევროკავშირის საბჭომ უკრაინისთვის 90 მილიარდი ევროს სესხი და რუსეთის წინააღმდეგ სანქციების მე-20 პაკეტი დაამტკიცა. ინფორმაცია ევროკავშირის საბჭოს კვიპროსის თავმჯდომარეობა ავრცელებს.

„სესხი ხელს შეუწყობს 2026-2027 წლებში უკრაინის გადაუდებელი საბიუჯეტო და თავდაცვითი საჭიროებების დაფინანსებას“, - წერს კვიპროსის თავმჯდომარეობა X-ზე.

ევროკავშირის მრავალწლიანი ფინანსური ჩარჩოს ცვლილებამ მოხსნა უკანასკნელი სამართლებრივი ბარიერი, რაც უკრაინისთვის 90 მილიარდი ევროს ოდენობის სესხის გამოყოფას შესაძლებელს ხდის მიმდინარე და მომდევნო წლებში.

ასევე, საბჭომ რუსეთის წინააღმდეგ ევროკავშირის სანქციების მე-20 პაკეტიც დაამტკიცა.

„უკრაინის წინააღმდეგ აგრესიული ომის ესკალაციის საპასუხოდ, საბჭომ რუსეთის წინააღმდეგ სანქციების მე-20 პაკეტი მიიღო“, - აცხადებს კვიპროსის თავმჯდომარეობა.

ამ ორი გადაწყვეტილების მიღებას წინ უძღოდა რუსული ნავთობის ფიზიკური მიწოდება უნგრეთსა და სლოვაკეთში „დრუჟბას“ მილსადენით, რის შემდეგაც ორივე ქვეყანამ დოკუმენტს ხელი მოაწერა.