უკრაინის პრეზიდენტის, ვოლოდიმირ ზელენსკის თქმით, უკრაინულმა ძალებმა მტრის პოზიციების დაკავება ქვეითი ჯარის ჩართულობის გარეშე, მხოლოდ დისტანციური ტექნოლოგიებით შეძლეს.
პირველად რუსეთ–უკრაინის ომის ისტორიაში მტრის პოზიცია მთლიანად მხოლოდ უპილოტო პლატფორმების გამოყენებით იქნა აღებული. გამოყენებული იყო სახმელეთო რობოტიზებული კომპლექსები და დრონები.
"ომის ისტორიაში პირველად, უკრაინამ მტრის პოზიცია მხოლოდ სახმელეთო რობოტიზებული კომპლექსებისა და დრონების გამოყენებით აიღო. ოკუპანტები ტყვედ ჩაბარდნენ. ოპერაცია განხორციელდა ქვეითი ძალების მონაწილეობის გარეშე და ჩვენი მხრიდან დანაკარგების გარეშე", - განაცხადა ზელენსკიმ.
ზელენსკიმ აღნიშნა, რომ ეს არის პირველი შემთხვევა, როდესაც სტრატეგიული პოზიციების აღება ექსკლუზიურად სახმელეთო რობოტიზებული სისტემებისა და დრონების მეშვეობით მოხდა.
ზელენსკიმ ასევე დააანონსა ევროპელ პარტნიორებთან მოლაპარაკებები ერთობლივი საჰაერო თავდაცვის სისტემის შექმნაზე. მისი თქმით, უკრაინა ან გახდება ევროპული უსაფრთხოების სისტემის განუყოფელი ნაწილი, ან ევროპის ნაწილი რისკავს აღმოჩნდეს „რუსული სამყაროს“ გავლენის ქვეშ.
