აშშ-ის ვიცე-პრეზიდენტმა ჯეი დი ვენსმა კვირას დატოვა ისლამაბადი, მას შემდეგ რაც 21-საათიანი მოლაპარაკებების შემდეგ ირანთან შეთანხმებას ვერ მიაღწია, ამის შესახებ წერს The Guardian წერს.
ჯეი დი ვენსის განცხადებით, ირანულმა მხარემ უარი თქვა ამერიკული პირობების მიღებაზე.
"ჩვენ არაერთი სიღრმისეული დისკუსია გვქონდა ირანელებთან, ეს კარგი ამბავია, მაგრამ ცუდი ამბავი ისაა, რომ შეთანხმებას ვერ მივაღწიეთ და ჩემი აზრით, ეს ბევრად უფრო ცუდია ირანისთვის, ვიდრე – ამერიკის შეერთებული შტატებისთვის.
ასე რომ, აშშ-ში ვბრუნდებით ისე, რომ შეთანხმება მიღწეული არ არის. ჩვენ ძალზე მკაფიოდ გამოვხატეთ, თუ სად გადის ჩვენი წითელი ხაზები, რა მხრივ ვართ მზად, რომ მათი პირობები გავითვალისწინოთ და რა არის ჩვენთვის მიუღებელი. ჩვენ ეს მაქსიმალურად გარკვევით განვმარტეთ და მათ გადაწყვიტეს, არ დათანხმებოდნენ ჩვენს პირობებს", - განაცხადა ვენსმა ისლამაბადში ირანის დელეგაციასთან გამართული მოლაპარაკებების შემდეგ.
„ჩვენ საკმაო დათმობაზე წავედით. პრეზიდენტმა დონალდ ტრამპმა გვითხრა: ‘უნდა ჩახვიდეთ კეთილი განზრახვით და მაქსიმალურად ეცადოთ შეთანხმების მიღწევას’. ჩვენ ასე მოვიქეცით, მაგრამ სამწუხაროდ, ვერანაირ პროგრესს ვერ მივაღწიეთ,“ - აღნიშნა ვენსმა.
ვენსის თქმით, ირანი მზად არ არის უარი თქვას ბირთვული იარაღის მოპოვებაზე
პაკისტანის დედაქალაქი დატოვა ირანის დელეგაციამაც.
ირანის საგარეო საქმეთა სამინისტროს ოფიციალურმა წარმომადგენელმა ესმაილ ბაღაიმ განაცხადა, რომ გამართული შეხვედრების დროს არსებობდა „უნდობლობის ატმოსფერო“. ირანის დელეგახიის წარმომადგენელთა თქმით, აშშ-სთან მოლაპარაკებების ჩავარდნის მიზეზი გახდა შეერთებული შტატების „არარეალური“ და „უსაფუძვლო“ მოთხოვნები.
ირანის პოზიციის თანახმად, აშშ აყენებს პირობებს, რომლებიც სცდება შეთანხმების რეალურ ჩარჩოს, როგორც მედია აღნიშნავს, ვაშინგტონი ცდილობს მაქსიმალური დათმობების მიღებას ირანისგან;ამიტომ თეირანი ასეთ პირობებს ვერ მიიღებს, რის შედეგადაც მოლაპარაკებები ჩაიშალა.
