აშშ-ის პრეზიდენტმა დონალდ ტრამპმა განაცხადა, რომ ჰორმუზის სრუტე „მალე კვლავ გაიხსნება“, მიუხედავად იმისა, ითანამშრომლებს თუ არა ირანი. მისი თქმით, ამერიკელი მომლაპარაკებლები, რომლებიც პაკისტანში გაემგზავრნენ, ძირითადად კონცენტრირებულნი არიან იმაზე, რომ ირანმა ბირთვული იარაღი ვერ მიიღოს. ამის შესახებ ტრამპმა ენდრიუსის ბაზაზე განაცხადა.
„ვფიქრობ, ეს საკმაოდ სწრაფად მოხდება. თუ ასე არ მოხდა, ჩვენ ამ საკითხს ასე თუ ისე მოვაგვარებთ", - აღნიშნა ტრამპმა..
ტრამპმა ასევე აღნიშნა, რომ ირანთან შეთანხმებაში მისი მთავარი პრიორიტეტი ქვეყნის ბირთვული პოტენციალის შეზღუდვაა.
„არავითარი ბირთვული იარაღი. ეს შეთანხმების 99%-ია,“ - განაცხადა ტრამპმა.
შეკითხვაზე, შეეხება თუ არა შეთანხმება ასევე ჰორმუზის სრუტეს, ტრამპმა დადებითად უპასუხა.
„დიახ, მაგრამ ეს ავტომატურად მოგვარდება,“ , უპასუხა მან და მოგვიანებით დაამატა, რომ მისი აზრით, ჰორმუზის სრუტე „საკმაოდ მალე გაიხსნება“.
ცნობისათვის, აშშ-ის ვიცე-პრეზიდენტი პაკისტანში გაემგზავრა, რათა უხელმძღვანელოს ამერიკულ დელეგაციას ირანთან მოლაპარაკებებზე. პაკისტანში ასევე გაემგზავრნენ დონალდ ტრამპის წარმომადგენლები სტივ უიტკოფი და ჯარედ კუშნერი.
