6 აპრილის ღამეს, რუსეთის ძალებმა ოდესაზე მასშტაბური იერიში მიიტანეს მოირიშე დრონების გამოყენებით, რის შედეგადაც მრავალსართულიანი შენობის ნაწილი დაინგრა.
ინფორმაციას ოდესის ოლქის სამხედრო ადმინსიტრაციის ხელმძღვანელი სერჰიი ლისაკი ავრცელებს.
ლისაკის თქმით, მტრის თავდასხმა ქალაქის პრიმორსკის და კიევის რაიონებში საცხოვრებელ შენობებზე განხორციელდა.
ერთ-ერთ რაიონში დრონი მაღალსართულიან შენობას შეეჯახა. მნიშვნელოვნად დაზიანდა მესამე-მეხუთე სართულები.
„სამწუხაროდ, ღამით განხორციელებული მტრის თავდასხმის შედეგად, ცნობილია სამი ადამიანის, მათ შორის ერთი ბავშვის, დაღუპვის შესახებ. ასევე დაშავდა ათი ადამიანი. ორი ადამიანი მძიმე მდგომარეობაში საავადმყოფოში მოათავსეს: ერთი პაციენტი ნეიროქირურგიის განყოფილებაშია, მეორე კი დამწვრობის ინტენსიური თერაპიის განყოფილებაში. რვა ადამიანის მდგომარეობა საშუალო სიმძიმისაა, მათ შორის ორი წლის ბავშვისა და 17 და 18 წლის ორი მოზარდის მდგომარეობა საშუალო სიმძიმისაა. ყველა მათგანი საჭირო სამედიცინო დახმარებას იღებს“, - განაცხადა ლისაკმა.
