უკრაინის პრეზიდენტის ადმინისტრაციის ხელმძღვანელმა და რუსეთთან უკრაინის მოლაპარაკებათა ჯგუფის წევრმა კირილო ბუდანოვმა განაცხადა, რომ რუსული მხარე უკრაინისთვის შეერთებული შტატების უსაფრთხოების გარანტიებს დათანხმდა.
მან ასევე ისაუბრა სამხედრო ქვეჯგუფში მოლაპარაკებების პროგრესზე.
„წინა მოლაპარაკებების დროს რუსულმა მხარემ პირდაპირ განაცხადა, რომ ისინი მიიღებენ უკრაინისთვის შეერთებული შტატების მიერ შეთავაზებულ უსაფრთხოების გარანტიებს... დემილიტარიზებული ზონის კონტროლთან დაკავშირებით, ეს სამხედრო ქვეჯგუფის საკითხია. სწორედ აქ არის მიღწეული ყველაზე მეტი პროგრესი. ისინი მივიდნენ დასკვნამდე, თუ როგორ იმუშავებს მონიტორინგი ომის დასრულების შემდეგ. ტერიტორიების საკითხთან დაკავშირებით, ჩვენ ვეძებთ კომპრომისს ორ აბსოლუტურად პოლარულ პოზიციას შორის. ჩვენ ის ჯერ სრულად ვერ ვიპოვეთ. იმედია ვიპოვით. ამისთვის დიდი დრო არ გვაქვს. საბოლოო ჯამში, უნდა ვაღიაროთ: ან ვიპოვით გამოსავალს და დავასრულებთ ამ ომს, ან... გავაგრძელებთ ერთმანეთის ხოცვას“, - განაცხადა ბუდანოვმა.
მისი თქმით, რუსეთის არმიის ამჟამინდელი მდგომარეობა მას კიევზე თავდასხმის საშუალებას არ აძლევს.
ამავდროულად, ბუდანოვმა განაცხადა, რომ უკრაინა მზად უნდა იყოს ლვოვში ცოტა ხნის წინ მომხდარი ტერორისტული თავდასხმების მსგავსი ტერორისტული თავდასხმებისთვის.
