დიდი ბრიტანეთის ყოფილმა პრემიერ-მინისტრმა რიში სუნაკმა უკრაინის მთავრობისთვის ეკონომიკური აღდგენის საკითხებში კონსულტაციების გაწევა დაიწყო, რადგან კიევი მომავალი ზამთრისთვის ენერგეტიკული სექტორის აღდგენას ცდილობს. ამის შესახებ The Independent იუწყება.
გამოცემა განმარტავს, რომ ბრიტანეთის ყოფილმა პრემიერ-მინისტრმა ანაზღაურების გარეშე თანამდებობა დაიკავა უკრაინის პრეზიდენტ ვოლოდიმირ ზელენსკის საერთაშორისო საკონსულტაციო საბჭოში, რომელიც უკრაინის ეკონომიკური აღდგენის საკითხებით არის დაკავებული.
საკონსულტაციო საბჭო, სავარაუდოდ, შექმნის ექსპერტთა ჯგუფს, რომელიც კონსულტაციებს გაუწევს როგორც ზელენსკის, ასევე მის ეკონომიკურ მრჩეველს, კანადის ყოფილ ვიცე-პრემიერ კრისტია ფრილენდს.
როგორც გამოცემა აღნიშნავს, სუნაკმა განაცხადა, რომ მისთვის „პატივი“ იყო უკრაინის პრემიერ-მინისტრის რანგში მხარდაჭერა. მან შეაქო ზელენსკის ხელმძღვანელობა და უკრაინელი ხალხი „ამ ომში წინააღმდეგობის გაწევისას ასეთი გამბედაობის, ასეთი ძალისა და ასეთი გამომგონებლობის“ დემონსტრირებისთვის.
„დასავლეთს ძლიერი უკრაინა სჭირდება და ძლიერ უკრაინას ძლიერი ეკონომიკა. ამიტომ, ძალიან მიხარია, რომ შევუერთდები საერთაშორისო გუნდს, რომელიც პრეზიდენტ ზელენსკის ეკონომიკური აღდგენის საკითხებში რჩევებს გაუწევს.
დარწმუნებული ვარ, რომ უკრაინას - თავისი ადამიანური კაპიტალით, ბუნებრივი რესურსებითა და ინოვაციების კულტურით - შეუძლია გახდეს ევროპის ერთ-ერთი ყველაზე დინამიური ეკონომიკა“, - თქვა ბრიტანეთის ყოფილმა პრემიერ-მინისტრმა.
მან გამოთქვა რწმენა, რომ მათი დახმარებით უკრაინა უსაფრთხო გახდება.
„ჩვენ შეგვიძლია დავეხმაროთ ძლიერი და უსაფრთხო უკრაინის მშენებლობაში, რომელიც უფრო უსაფრთხო და აყვავებული ევროპის ქვაკუთხედი იქნება“, - განაცხადა სუნაკმა.
