უკრაინის პრეზიდენტის ვოლოდიმირ ზელენსკის განცხადებით, უკრაინა რაც საჭიროა ყველაფერს გააკეთებს ომის დასასრულებლად და არ იქნება მშვიდობისთვის დაბრკოლება.
„ჩვენ ყოველდღიურად ვაგრძელებთ მუშაობას იმის უზრუნველსაყოფად, რომ მოლაპარაკებების შემდეგმა რაუნდმა შედეგი მოიტანოს უკრაინისთვის, შედეგი მოიტანოს მსოფლიოსთვის. უკრაინა აუცილებლად გააკეთებს ყველაფერს, რაც საჭიროა ამისთვის და ნამდვილად არ იქნება მშვიდობისთვის დაბრკოლება“, - განაცხადა უკრაინის პრეზიდენტმა ვიდეომიმართვისას.
„წინა ჯერზე ჟენევაში ამერიკულმა მხარემ ნათლად დაინახა, რომ სწორედ რუსეთია მნიშვნელოვანი შედეგების არარსებობის მიზეზი. და შემდეგი შეხვედრა უშედეგო არ უნდა იყოს; ეს შესაძლებელია“, - თქვა უკრაინის პრეზიდენტმა.
ზელენსკის თქმით, შაბათს მან უკრაინის დელეგაციის ხელმძღვანელთან, ეროვნული უსაფრთხოებისა და თავდაცვის საბჭოს მდივანთან, რუსტემ უმეროვთან მოლაპარაკებებისთვის მომზადების ზოგიერთი ასპექტი განიხილა.
„ჩემი შეხვედრები ევროპელ პარტნიორებთან უკვე დაგეგმილია მომავალ კვირას. ჩვენ მჭიდროდ ვითანამშრომლებთ, რათა უზრუნველვყოთ, რომ ევროპა ჩართული იყოს ყველა პროცესში და მხოლოდ გაძლიერდეს. ასევე დავავალე რუსტემს, რომ უფრო მეტად ითანამშრომლოს ჩვენს მეგობრებთან ახლო აღმოსავლეთსა და თურქეთში, რათა მათაც იგრძნონ თავი ჩართულად და შეძლონ მეტი დახმარება“, - თქვა უკრაინის პრეზიდენტმა.
