ევროკავშირის ცხრა ქვეყანა ეწინააღმდეგება ევროკომისიის გეგმას, რომელიც სტრუქტურაში დამატებით 2 500 თანამშრომლის დაქირავებას ითვალისწონებს, ამის შესახებ ნათქვამია გამოცემა Politico-ს სტატიაში.
გამოცემის ინფორმაციით, ავსტრიის, ჩეხეთის რესპუბლიკის, დანიის, გერმანიის, ესტონეთის, ლატვიის, შვედეთის, ფინეთისა და ნიდერლანდების მინისტრების თქმით, ევროკომისიამ უარი უნდა თქვას დაახლოებით 2 500 თანამშრომლის დაქირავებისა და ადმინისტრაციული ხარჯების გაზრდის გეგმებზე იმ დროს, როდესაც გაერთიანება წევრი ქვეყნების დედაქალაქებს „ქამრების შემოჭერას სთხოვს“.
ავსტრიის მიერ ინიცირებულ წერილში, რომლის ადრესატიც არის ბიუჯეტის, თაღლითობის წინააღმდეგ ბრძოლისა და საჯარო ადმინისტრირების საკითხებში ევროკომისარი პიოტრ სერაფინი, მინისტრები ითხოვენ, შეამცირონ ბლოკის მომდევნო გრძელვადიანი ბიუჯეტი, რომელიც ცნობილია როგორც მრავალწლიანი ფინანსური ჩარჩო (MFF).
ევროკავშირის ქვეყნები მომდევნო გრძელვადიანი ბიუჯეტის შესახებ მოლაპარაკებების პროცესში არიან კომისიის მიერ 2025 წლის ივლისში წარდგენილი თავდაპირველი წინადადების შემდეგ. ეს რთული პროცესი წლების განმავლობაში მიმდინარეობს და მასში ჩართულია ევროკავშირის სამივე ძირითადი ინსტიტუტი: კომისია, საბჭო და პარლამენტი. ამავდროულად, კომისია ახორციელებს მასშტაბურ მიმოხილვას, რომელიც მიზნად ისახავს საკუთარი პროცესების გამარტივებას.
