ირანის საგარეო საქმეთა მინისტრმა, აბას არაღჩიმ განაცხადა, რომ ირანს საპროტესტო აქციებთან დაკავშირებით, დემონსტრანტების ჩამოხრჩობის გეგმები არ აქვს.
„ჩამოხრჩობის გეგმა არ არსებობს. ჩამოხრჩობის საკითხი არ დგას“,- განაცხადა არაღჩიმ Fox News-სთან ინტერვიუში.
მისი თქმით, სამი დღის განმავლობაში ტერორისტების წინააღმდეგ იბრძოდნენ და არა მომიტინგეების.
დაღუპულთა რაოდენობის შესახებ შეკითხვაზე, რომ მათი რიცხვი, შესაძლოა 2500-დან 12000-მდე მერყეობდეს, არაღჩიმ უპასუხა, რომ დაღუპულია ასობით ადამიანი.
„როდესაც გარედან ტერორისტული ელემენტები შემოვიდნენ ამ საპროტესტო აქციებში, დაიწყეს პოლიციის ძალების, პოლიციის თანამშრომლებისა და უსაფრთხოების ძალების მიმართულებით სროლა. იქ იყვნენ ტერორისტული უჯრედები. ისინი შემოვიდნენ და გამოიყენეს „დაეშის“ სტილის ტერორისტული ოპერაციები. მათ პოლიციელები დაიჭირეს, ცოცხლად დაწვეს, თავები მოჰკვეთეს და დაიწყეს სროლა პოლიციელებისა და ასევე ხალხის წინააღმდეგ. შედეგად, სამი დღის განმავლობაში ჩვენ ფაქტობრივად ტერორისტების წინააღმდეგ ვიბრძოდით და არა მომიტინგეების წინააღმდეგ“, - აღნიშნა არაღჩიმ.
ირანის საგარეო საქმეთა მინისტრის თქმით, ტერორისტები ცდილობდნენ მსხვერპლთა რაოდენობის გაზრდას დონალდ ტრამპის კონფლიქტში ჩართვისთვის.
„პრეზიდენტმა ტრამპმა თქვა, რომ თუ მკვლელობები მოხდებოდა, ის ჩაერეოდა. მათ სურდათ მისი კონფლიქტში ჩათრევა. ეს იყო ზუსტად ისრაელის შეთქმულება. მიუხედავად იმისა, რომ ისინი ცდილობდნენ, გაეზარდათ მსხვერპლთა რაოდენობა, დაღუპულთა რაოდენობა მხოლოდ ასობითაა. ზუსტი მონაცემები ძალიან მალე, შესაძლოა, დღეს საღამოს გამოაცხადოს ჩვენმა ხელისუფლებამ“, – განაცხადა არაღჩიმ.
