პარტია "თავისუფალი დემოკრატების" წევრი დეპუტატი გიორგი ცაგარეიშვილი ციხეებში კერძო სექტორის შესვლით, ახალი კორუფციული სქემების ამოქმედებას ვარაუდობს.
გიორგი ცაგარეიშვილი დღევანდელ პლენარულ სხდომაზე "პატიმრობის შესახებ" კანონპროექტის განხილვისას დაინტერესდა, თუ სად უნდა ჩაირიცხოს გრძელვადიანი პაემნებისთვის დაწესებული საფასური 60 ლარი.
აღსანიშნავია ის გარემოება, რომ კანონპროექტის განმარტებით ბარათში ნათქვამია, რომ პროექტის ამოქმედება ბიუჯეტზე გავლენას არ იმოქმედებს, რაც იმას ნიშნავს, რომ 60 ლარიანი საფასური ბიუჯეტში არ შევა.
როგორც ამ საკითხზე გიორგი ცაგარეიშვილმა ჟურნალისტებს განუცხადა, ადამიანის უფლებათა დაცვის საპარლამენტო კომიტეტის თავმჯდომარე ლაშა თორდიასგან მიიღო განმარტება, რომ გრძელვადიანი პაემნების ამოქმედებისთვის რიგ მომსახურებაზე გამოცხადდება ტენდერი და აღნიშნული საფასურიც, სწორედ გამარჯვებული კომპანიების ანგარიშზე ჩაირიცხება.
ცაგარეიშვილი დარწმუნებულია, რომ ხელისუფლებას უკვე "შერჩეული" ჰყავს ის ფირმები, რომლებმაც ტენდერებში უნდა გაიმარჯვონ და ამ სისტემაშიც ისეთივე მონოპოლისტური სქემები ამოქმედდება, როგორიც სხვა სფეროებში არსებობს.
