ოპოზიციონერი დეპუტატი გია ცაგარეიშვილი დევნილების გამოსახლების პროცესს, რუსეთიდან ეთნიკური ქართველების გამოსახლების ფაქტებთან აიგივებს.
როგორც პარლამენტის დღევანდელ პლენარულ სხდომაზე ცაგარეიშვილმა განაცხადა, ხელისუფლებამ დევნილები ფართებიდან საერთაშორისო ნორმების დარღვევით გამოასახლა.
მისი თქმით, აგვისტოს ომის შემდეგ მმართველმა გუნდმა დევნილებს ინვენტარი შეუძინა, ხოლო 2 წლის თავზე სწორედ ეს ინვენტარი ავტომობილების საბარგულებში შეუყარეს და გაუნადგურეს.
"რუსეთის ფედერაციიდან ეთნიკურად ქართველები სატრასპორტო თვითმფრინავებით გამოუშვეს, ხოლო აზერბაიჯანამდე კი პურის მანქანებით მიიყვანეს. რომ არა აზერბაიჯანელი მეგობრები ამ ხალხის ბედი გაურკვეველი იყო. მაგრამ იგივე გააკეთა საქართველოს ხელისუფლებამ ამ დევნილების მიმართ, რადგან სწორედ საბარგულებით გაუშვეს ისინი რეგიონებში. ეს ხალხი ინვენტარს წლების მანძილზე აგროვებდა, ხელისუფლებამ კი გაუნადგურა", - აღნიშნა "თავისუფალი დემოკრატების" წევრმა.
დეპუტატის თქმით, დევნილებს არც კი უხსნიან სად გადაჰყავდათ.
"სამინისიტროს განმარტებები კი სამარცხვინოა. უკვე რამდენი ხანია კარვების ქალაქია სამინისტროს წინ, მაგრამ მიხვედით ვინმე და გაეცანით რა აწუხებთ?", - აღნიშნა ცაგარეიშვილმა.