პარლამენტის ვიცე-სპიკერი პაატა დავითაია თავდაცვისა და უშიშროების კომიტეტისგან ომში დაღუპული ჯარისკაცების ფოტოების ნაგავში გადაყრის ფაქტის გამოძიებს ითხოვს.
ამის შესახებ დეპუტატმა დღეს, საგაზაფხულო სესიის პირველ პლენარულ სხდომაზე განაცხადა.
"ვეტერანები თავდაპირველად გმირთა მოედანზე მემორიალთან იმ ბიჭების ხსოვნის დასაცავად გამოვიდნენ, რომლებმაც საქართველოს სიცოცხლე შეწირეს და თავდაცვის სამინისტროში გამოკრული მათი ფოტოები ნაგვის ურნაში იპოვეს", - აღნიშნა დავითაიამ.
მისივე თქმით, არავის არ უნდა ეგონოს, რომ ომი დამთავრდა, მაშინ როცა რუსეთს საქართველოს ოკუპირებულ ტერიტორებზე სტრატეგიული შეიარაღება და ტაქტიკური რაკეტები შემოაქვს.
"ეს ბიჭები მზად არიან თავი შეწირონ სამშობლოს და იმას მაინც უნდა ვაკეთებდეთ, რომ მათი სურათები, ვინც საქართველოს ერთიანობისთვის და თავისუფლებისთვის თავი შესწირა, იმ ნაწილებში დავკიდოთ, სადაც ეს გმირები მსახურობდნენ", - აღნიშნა დავითაიამ.
