სოფლის მეურნეობის მინისტრის ბაკურ კვეზერელის განმარტებით, 2011 წელს სურსათის მწარმოებელი კომპანიების შემოწმება განხორციელდება.
კონკრეტული დარღვევის აღმოჩენის შემთხვევაში, მათზე 2011 წელს სანქციები არ ამოქმედდება. წელს მათ მხოლოდ რეკომენდაციები მიეცემათ, ხოლო სანქციები 2012 წლიდან იქნება ამოქმედებული.
"დღეიდან სურსათის ეროვნულმა სააგენტომ სურსათის მწარმოებელი კომპანიების შემოწმება დაიწყო. ეს არის მონიტორინგი იმ მიზნით, რათა მეწარმეებთან ერთად აღმოვფხვრათ ხარვეზები და მოვახდინოთ მათი იდენტიფიკაცია და შესაბამისად მეწარმეებს ამ ხარვეზების აღმოსაფხვრელად რეკომენდაციები მივცეთ. წელს მათზე სანქციები არ ამოქმედდება, მათი ამოქმედება მხოლოდ მომავალი წლიდანაა დაგეგმილი" - განაცხადა ბაკურ კვეზერელმა.
შეგახსენებთ რომ დღეიდან "სურსათის ეროვნული სააგენტო" სურსათის მწარმოებელი კომპანიების კონტროლს, კომპანია "მითანას" შემოწმებით იწყებს.
ს.ს "ანა ჯგუფი" საქართველოში ერთ-ერთი უმსხვილესი ჰოლდინგია, რომელიც აერთიანებს სამი სხვადასხვა მიმართულების მქონე კომპანიას: ხორც-პროდუქტების წარმოებელი ქარხანა "მითანას", საკონდიტრო პროდუქციის წარმოებელი ფაბრიკა "ტკბილი ქვეყანას" და სადისტრიბუციო კომპანია "კანტს".
ს.ს. "ანა ჯგუფი დაარსდა 2005 წლის მაისში. ამჟამად საწარმოო ფართი შეადგენს 13-ათას კვ.მ -ს, სასაწყობო მეურნეობა 4-ათასი კვ.მ-ს, დამხმარე ნაგებობები -ათას კვ.მ-ს, ხოლო ადმინისტრაციული ფართი 2020კვ.მ-ს.
როგორც "სურსათის ეროვნული სააგენტოში" განმარტავენ, საწყის ეტაპზე სააგენტო ხორც-პროდუქტებისა და რძის-პროდუქტების მწარმოებელ კომპანიებს შეამოწმებს.
2011 წლის 3 იანვრიდან ძალაში შევიდა სახელმწიფო კონტროლი სურსათის მწარმოებელი კომპანიებისათვის, რაც იმას ნიშნავს, რომ მაღალი რისკის საწარმოები ინსპექტირებას დაექვემდებარა.
2010 წელს სამსახურის მიერ 51 ექსპორტიორი კომპანია შემოწმდა, ხოლო 2011 წელს 200 სურსათის მწარმოებელი კომპანია შემოწმდება.
სურსათის მწარმოებელ კომპანიებს საწარმოს კანონით გაწერილ სტანდარტებთან შესაბამისობაში მოსაყვანად ერთი წელი აქვთ.
"სურსათის ეროვნული სააგენტოს" ინფორმაციით, სამსახურს გეგმური შემოწმების გარდა არაგეგმური შემოწმების უფლებაც აქვს, თუმცა არაგეგმური შემოწმების განსახორციელებლად სამსახურს სასამართლოს ნებართვა სჭირდება.
"სურსათის ეროვნული სააგენტო" სურსათის მწარმოებელ საწარმოში გამოვლენილი დარღვევის შემდეგ, საწარმოს რეკომენდაციას და პრობლემების აღმოსაფხვრელად გარკვეულ ვადას აძლევს. თუკი გაწერილ ვადაში კომპანიამ პრობლემა არ მოაგვარა ,მაშინ მეწარმე დაჯარიმდება.