როგორც პარლამენტის დღევანდელ პლენარულ სხდომაზე "ქრისტიან-დემოკრატების" წევრმა ლევან ვეფხვაძემ აღნიშნა, კომუნალური გადასახადების ერთიან სისტემაზე გადასვლის პარალელურად, მოხდა ტარიფების გაზრდაც, რაც არაადეკვატურია და მოსახლეობას ფაქტიურად უწევს მოუხმარებელი მომსახურების გადახდა.

"ერთ სულ მოსახლეზე ანგარიშობენ 800 ლიტრ წყალს, რაც სრულიად შეუძლებელია. მოქალაქეებს ფულს არაფერში ვახდევინებთ. ასეთი ანგარიშის გამო ოთხ სულიან ოჯახს უწევს 20-22 ლარი და პლუს დენის გადასახადის გადახდა. ეს მაშინ ხდება, როცა მოსახლეობის სოციალური მდგომარეობა გადახდის ერთიანმა სისტემამ ისედაც დაამძიმა", - აღნიშნა ვეფხვაძემ.

ამასთან, პარლამენტის ვიცე-სპიკერმა დარგობრივი ეკონომიკის კომიტეტის თავმჯდომარე გიორგი მელაძეს მოუწოდა, სემეკის, მერიისა და თვითმმართველობის წარმომადგენლებთან ერთად მოხდეს ტარიფების ხელახლა გათვლა.

ასევე, დაიწყოს ჯონდი ბაღათურიას ინიციატივის განხილვა, ერთიანი გადასახადების სისტემასთან დაკავშირებით.