ოპოზიციონერი დეპუტატი ჯონდი ბაღათურია ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს საქმიანობის შესასწავლად პარლამენტში სპეციალური კომისიის შექმნას ითხოვს.
აღნიშნული ინიციატივით ბაღათურია დღეს, საგაზაფხულო სესიის პირველ პლენარულ სხდომაზე, გამოვიდა.
"ლტოლვილთა სამინისტროში ფინანსურ დარღვევებზე კონტროლის პალატის მიერ გაკეთებული ანალიზის თანახმად 4 მილიონამდე ლარის ინვენტარიზაცია შესახებ ინფორმაცია არ არსებობს, ასევე არ არსებობს არანაირი საბუთი ნახევარი მილიონი ლარი დევნილებისთვის შეშის შეძენაში მართლაც დაიხარჯა თუ არა. გვაქვს საფუძვლიანი ეჭვი, რომ ეს ფული სამინისტროში შეჭმულია", - აღნიშნა "ქართული დასის" ლიდერმა.
მისივე თქმით, დევნილებზე ერთჯერადი დახმარების სახით სამინისტროს ნახევარი მილიონი ლარი აქვს გაცემული, მაგრამ დღემდე არ არსებობს კრიტერიუმები, რომლის მიხედვითაც დახმარების გაცემა ხდება.
"ეს მიანიშნებს, რომ სამინისტროში ადგილი აქვს ელიტარულ კორუფციას. ასევე დღემდე არ აქვს 1500 დევნილს სტატუსი მინიჭებული რაც კანონის დარღვევა. მათთვის გამოყოფილი 28 მილიონი ლარი კი გამქრალია", - აღნიშნა დეპუტატმა.